Psalms 33
1Abimelextiń aldında ózin aqılı kemis qılıp kórsetip, onıń aldınan quwılǵan waqıtta ▼ Dawıttıń aytqan jırı2Hámme waqıtta Jaratqan Iyege alǵıs aytaman,
Alǵıs-maqtaw túspeydi awzımnan.
3Jaratqan Iye menen maqtanar janım,
Ezilgenler esitip, shad bolsın!
4Meniń menen birge Jaratqan Iyeni ullılań,
Atın birgelikte dańqqa bóleyik.
5Jaratqan Iyege jalbarındım, Ol juwap berdi maǵan,
Meni azat etti barlıq qáwip-qáterden.
6Onnan úmit qılǵanlardıń júzlerinde nur jarqıraydı,
Uyatqa qalıp, júzleri qızarmaydı.
7Men ezilip jalbarındım, Jaratqan Iye esitti,
Meni barlıq azaplarımnan azat etti.
8Jaratqan Iyeden qorqatuǵınlardıń átirapına,
Onıń perishteleri orda qurıp, qutqarar olardı.
9Jaratqan Iyeniń jaqsılıǵın tatıń hám kóriń.
Qanday baxıtlı Onnan pana tapqanlar.
10Jaratqan Iyeden qorqıń, háy, Onıń muxaddesleri,
Onnan qorqqanlardıń bolmas mútájligi.
11Hátteki, arıslanlar ash hám mútáj bolar,
Biraq hesh qanday mútájlik kórmes Jaratqan Iyege kelgenler.
12Keliń, háy balalar, tıńlań meni,
Úyreteyin sizlerge Jaratqan Iyeden qorqıwdı.
13Kim ómirden zawıqlanıp,
Jaqsı kúnler keliwin qáleydi?
14Onda, tilińizdi jaman sózden,
Awzıńızdı ótirik sóz aytıwdan tıyıń.
15Jamanlıqtan qashıp, jaqsılıq isleń,
Tınıshlıqqa umtılıp, soǵan kúsh salıń.
16Jaratqan Iyeniń kózi haq adamlarda,
Qulaǵın túrer olardıń dadına.
17Jaratqan Iye jamanlıq qılatuǵınlarǵa qarsı shıǵar,
Jer júzinen olardıń atların óshirer.
18Haq adamlar jalbarınar, Jaratqan Iye esiter,
Barlıq azaplarınan olardı azat eter.
19Jaratqan Iye kewli qabarǵanlarǵa jaqındur,
Ruwxı ezilgenlerdi qutqarar.
20Haq adamnıń qayǵıları kóp bolsa,
Jaratqan Iye bulardan onı azat qılar,
21Barlıq súyeklerin aman saqlar,
Sındırılmas onıń bir súyegi de.
22Jamanlıq zalımdı óltirer,
Haq adamnan jerkengen jaza alar.
23Óz qulların Jaratqan Iye qutqarar,
Hesh qanday jaza almas Onnan pana tapqanlar.
Copyright information for
KaaIBT22L