‏ Psalms 34

1Dawıttıń jırı
Jaratqan Iye, maǵan qarsı bolǵanlarǵa Óziń qarsı shıq,
Maǵan hújim qılǵanlarǵa Óziń qarsı hújim qıl!
2Úlken hám kishkene qalqan alıp,
Maǵan járdemge kel!
3Meni quwıp kiyatırǵanlarǵa qarsı,
Nayza hám baltańdı al.
«Seni Men qutqaraman», – dep wáde ber maǵan!

4Janıma qaslıq qılıp júrgenler,
Uyatqa qalıp, masqara bolsın!
Maǵan qarsı jawız niyet etkenler,
Shermendesi shıǵıp, artqa sheginsin!
5Olar samalda ushqan qawıq sıyaqlı bolsın,
Jaratqan Iye, Seniń perishteń izine tússin!
6Qarańǵı hám sırǵanaq bolsın olardıń jolı,
Jaratqan Iye, Seniń perishteń quwsın olardı!

7Sebepsiz maǵan tor qurdı,
Meni tutıp alıw ushın, sebepsiz shuqır qazdı.
8Tosattan olardıń basına apat kelsin,
Qoyǵan torına ózleri tússin,
Qazǵan shuqırına ózleri qulasın.

9Sonda Jaratqan Iye, Sen arqalı shadlanaman,
Meni qutqarǵanıń ushın quwanaman.
10Pútkil barlıǵım bılay deydi:
«Hálsizdi kúshliniń qolınan,
Biyshara hám jarlını tonawshılardan qutqaratuǵın,
Saǵan uqsaǵan kim bar, Jaratqan Iye?»

11Jawız niyetli gúwalar turıp,
Bilmeytuǵın nárseler haqqında mennen sorar.
12Olar jaqsılıǵıma jamanlıq qaytarar,
Janım jalǵızlanıp qaldı.
13Olar kesel bolǵan waqıtta,
Aza kiyim kiyip, oraza tuttım.
Basımdı iyip, duwa qıldım.
14Dostım, tuwısqanım, dep qayǵırdım,
Anam ushın aza tutqanday etip,
Qayǵıdan basımdı iyip júrdim.
15Olar bolsa, jıǵılǵanımda jıynalıp, shad boldı,
Maǵan qarsı jıynaldı biytanıs adamlar,
Toqtamastan meni talap tasladı.
16Qudaysızlarday ayamay masqara qıldı,
Maǵan qarap, tislerin qayradı.

17Iyem, qashanǵa deyin qarap turasań?
Qutqara gór janımdı olardıń hújiminen,
Azat qıla gór bul arıslanlardan!
18Ullı jámiyet ishinde Saǵan shúkir aytaman,
Sansız xalıq arasında Saǵan alǵıs-maqtaw aytaman.

19Ústimnen kúlmesin sebepsiz maǵan dushpan bolǵanlar,
Kózlerin alartpasın ayıpsız meni jek kórgenler.
20Tınıshlıq sózin awzına almas olar,
Al elde tınısh jasap atırǵanlarǵa qarsı,
Jalǵan sózlerdi oylap tabar.
21Maǵan qarsı awzın keń ashıp, bılay dep aytar:
«Hay-hay, óz kózimiz benen kórdik qılmıslarıńdı!»

22Hámmesin kórdiń, Jaratqan Iye, únsiz qalma,
Iyem, mennen uzaq bolma!
23Oyan, tur, huqıqımdı qorǵap,
Men ushın gúres, Qudayım, Iyem!
24Ádilligińe góre, meni aqlay gór, Qudayım Jaratqan Iye!
Ústimnen kúlmesin dushpanlarım!
25Olar ishinen bılay dep aytpasın:
«Hay-hay, boldı-ǵo biziń qálegenimiz!»
«Onıń basına jettik!» – demesin.

26Awır awhalıma shadlanǵanlar,
Uyalıp, shermende bolsın,
Mennen ózlerin ústin qoyǵanlar,
Uyat hám shermendelikke shırmalıp qalsın.

27Meniń haq bolıp shıǵıwımdı qálegenler,
Shadlanıp baqırıp, quwansın.
Tınbastan bılay dep aytsın olar:
«Qulınıń amanlıǵın qálegen Jaratqan Iye ullılansın!»
28Sonda kúni boyı tilimnen túspes Seniń ádilligiń,
Saǵan arnap alǵıs-maqtaw aytaman.