‏ Psalms 36

1Dawıttıń jırı
Jamanlıq qılıwshılarǵa kóziń qızbasın,
Nahaqlıq islewshilerge háwes qılma!
2Olar maysa shóptey tez solıp qalar,
Kók shóptey tez quwrap qalar.

3Sen Jaratqan Iyege úmit baylap, jaqsılıq qıl,
Usı elde jasap, sadıqlıqtı saqla.
4Jaratqan Iyeden zawıqlan,
Ol júregińdegi qálewińdi ámelge asırar.

5Ómir jolıńdı Jaratqan Iyege tapsır,
Oǵan isen, sonda Ol sen ushın háreket eter.
6Ol seniń ádilligińdi nur sıyaqlı jarqıratıp,
Haqlıǵıńdı kúndizgi quyashtay qılar.

7Jaratqan Iyeniń aldında sabırlı bol, Oǵan úmit bayla,
Háwes qılma óz jolında áwmetli bolıp,
Jawız niyetlerin ámelge asırǵanlarǵa.
8Ǵázebińdi tıyıp, ashıwıńdı bas,
Qızba bolma, bul tek zıyan alıp keler.
9Jawızlıq etiwshiler joq etiler,
Jaratqan Iyeden úmit etiwshiler elge iyelik eter.

10Tez arada napáktiń kúni pitedi,
Qansha izleseń de, bul jerde taba almaysań onı.
11Kishipeyiller bolsa, elge iyelik qılar,
Mol baxıtqa erisip, ráhát tabar.
12Napák adam pák adamǵa qarsı jaman niyet qılar,
Oǵan qarsı tislerin ǵıshırlatar.
13Biraq Iye napákler ústinen kúler,
Olardıń kúni pitkenin biler.

14Biyshara hám jarlını qulatıp,
Tuwrı jolda júrgenlerdi óltiriw ushın,
Napákler qılıshın jalańashlap, kerdi sadaqların.
15Biraq qılıshları ózleriniń júregine suǵılar,
Sadaqları da sınıp keter.

16Haq adamnıń az zatı,
Napáktiń baylıǵınan góre abzaldur.
17Napáktiń kúshi qırqılar,
Haq adamdı bolsa, Jaratqan Iye qollap quwatlar.

18Minsizlerdiń hár kúni Jaratqan Iyege belgili,
Máńgi dawam eter olardıń miyrası.
19Uyatqa qalmas olar jaman kúnlerde,
Qarınları toq bolar ashlıq waqıtta da.

20Biraq napákler sózsiz qırılıp qalar,
Jaratqan Iyeniń dushpanları dala gúlindey solıp,
Tútin yańlı tarqalıp, joq bolar.

21Napákler qarız alar, qaytıp bermes,
Haq adam bolsa saqıylıq penen berer.
22Jaratqan Iye jarılqaǵan adamlar elge iyelik qılar,
Al Ol ǵarǵaǵan adamlar joq bolıp keter.

23Adamnıń júrgen jolına,
Jaratqan Iyeniń kewli tolsa,
Onıń qádemlerin bekkemler.
24Ol súrnikse de, jıǵılmas,
Jaratqan Iye qolınan uslap qalar.

25Men jas edim, endi qartaydım,
Haq adamnıń taslap ketilgenin,
Onıń urpaǵınıń nan soraǵanın kórmedim.
26Ol hámme waqıtta saqıylıq penen qarız berer,
Urpaǵı da jarılqaw alıp keler.

27Jamanlıqtan qashıp, jaqsılıq qıl,
Sonda elińde máńgi jasarsań.
28Jaratqan Iye haqlıqtı súyer,
Ol sadıq qulların tárk etpes.
Olardı máńgi qorǵar,
Napáklerdiń urpaǵı joq bolar.
29Haq adamlar eldi múlik etip alar,
Sol elde máńgi jasap qalar.

30Haqtıń awzınan danalıq shıǵar,
Onıń tili ádalattı sóyler.
31Qudayınıń nızamı júregindedur,
Sonıń ushın, qádeminde adaspas.

32Napák adam haq adamdı ańlıp júrer,
Onı óltiriwdiń jolın izler.
33Jaratqan Iye haq adamdı napáklerdiń qolına tapsırmas,
Húkim etilgende, onı ayıplı qılmas.

34Jaratqan Iyege úmit bayla, Onıń jolınan júr,
Ol seni mártebeli qılıp, bul eldi múlik qılıp berer.
Napáktiń qırılıp ketkenin kórerseń.

35Kórdim napák hám jawız adamnıń,
Óz topıraǵında jasıl terektey ósip-óngenin.
36Biraq uzaq turmay, ol ótip ketti, joq boldı,
Qansha izlesem de, taba almadım onı.

37Minsizge itibar ber, haq adamǵa qara,
Tınıshlıqtı súyetuǵınlardıń keleshegi bar.
38Gúnakarlardıń hámmesi qırılıp keter,
Napáktiń keleshegi joq bolar.

39Haqlardıń qutqarılıwı Jaratqan Iyeden,
Apat kúninde olarǵa bolar qorǵan.
40Jaratqan Iyeden pana tapqanı ushın,
Jaratqan Iye olardı qollap quwatlap, qutqarar,
Napáklerdiń qolınan aman saqlap, azat qılar.