‏ Psalms 37

1Dawıttıń yadqa salıw jırı
2Jaratqan Iye, ǵázeplenip, meni áshkaralama,
Qáhárlenip, meni jazalama!
3Ishime qadaldı oqlarıń,
Ústime basıldı qollarıń.
4Ǵázebińnen denemde qalmadı saw jerim,
Gúnam sebepli sırqıraydı súyeklerim.
5Ayıplarım basımnan astı,
Olar awır júk bolıp, jelkemdi bastı.

6Aqılsızlıǵım sebepli,
Jaralarım sasıp, iriń basıp ketti.
7Iyilip, eki búklenip qaldım,
Kúni boyı ǵam shegip júremen.
8Ot bolıp janar meniń belim,
Denemde qalmadı saw jerim.
9Dińkem qurıp, pútkilley ezildim,
Júregimniń sızlawınan nala shegemen.

10Iyem, júregimdegi barlıq qálewlerimdi bileseń,
Nalalarım jasırın emes Sennen.
11Júregim titireydi, kúsh-quwatım ketti,
Kózlerimniń nurı pútkilley sóndi.
12Dos-yaranlarım qashtı jaralarım sebepli,
Jaqınlarım qasıma kelmey qoydı.
13Janıma qas adamlar maǵan duzaq qurar,
Niyeti jawızlar maǵan ólim tiler,
Kúni boyı maǵan qarsı hiyle oylap júrer.

14Al men gereń sıyaqlı esitpeymen,
Tilsiz adamday awzımdı ashpayman.
15Shınında da, men gúńge uqsayman,
Tilinde juwabı joq adamdayman.
16Úmitim Sende, Jaratqan Iye,
Sen juwap bereseń, Quday Iyem!
17Saǵan duwa etip, bılay dedim:
«Jaǵdayımdı kórip, dushpanlarım kúlmesin,
Ayaqlarım súrnikkende, ózlerin mennen ústin qoymasın!»

18Jıǵılayın dep turıppan,
Ashshı qayǵımdı ishime jutıp atırman.
19Jınayatlarımdı moyınlayman,
Gúnalarım sebepli qayǵıraman.
20Al dushpanlarım kúshli hám aman júripti,
Sebepsiz meni jek kóretuǵınlar kóbeyip ketti.
21Olar jaqsılıǵıma jamanlıq qaytarar,
Iygilikli islerim ushın maǵan dushpan bolar.

22Meni taslap ketpe, Jaratqan Iye!
Qudayım, mennen uzaq bolma!
23Maǵan járdem beriwge asıq,
Qutqarıwshım, Iyem!