Psalms 38
1Atqarıwshılardıń jetekshisi Edutunǵa ▼. Dawıttıń jırı2Men ózime bılay dedim:
«Atqan adımıma dıqqat qılayın,
Tilimdi gúnadan tıyıp júreyin,
Aldımda napákler tursa da,
Awzıma qum quyıp qoyayın».
3Tilimdi tıyıp, únsizlik saqladım,
Hátte, jaqsı nárseni aytıwdan bas tarttım.
Artıp ketti meniń dártim.
4Júregim ottay bolıp, lawlap ketti,
Oylaǵan sayın, kewlim órtendi,
Mına sózler tilimnen tógildi:
5«Bildire gór aqıbetimdi, Jaratqan Iye,
Bildir qansha kúnlerim qalǵanın,
Bileyin ómirimniń qanshelli qısqa ekenin!
6Qısqa ómir bergenseń maǵan,
Seniń názerińde hesh nársedur ómirim,
Bir demdur hár bir adamnıń ómiri. Selah
7Hár bir adamnıń ómiri sayaday ótip keter,
Adamzattıń háreketi biyhuda bolar,
Mal-dúnya jıynar,
Biraq onıń kimge qalatuǵının bilmes.
8Men endi ne kútiwim múmkin, Iye?
Barlıq úmitim Sennen.
9Azat qıla gór barlıq jınayatlarımnan,
Aqmaqlardıń ústimnen kúliwine jol qoyma.
10Únsizlik saqlayman, ashpayman awzımdı,
Sebebi Sen islediń bunı.
11Judırıǵıńdı uzaqlastır mennen,
Sen bergen soqqılardan tamam boldım.
12Gúnaları ushın adamzattı,
Jazalap, jolǵa salasań.
Kúye jegendey, áziz nárselerin joq qılasań,
Sózsiz, adamzat bir demde ótip ketedi. Selah
13Duwamdı esit, Jaratqan Iye,
Qulaq sal jalbarınıwıma,
Kóz jaslarıma biypárwa bolma!
Men bir qonaqpan aldıńda Seniń,
Ata-babalarım sıyaqlı kelgindimen.
14Qáhárli názerińdi uzaqlastır mennen,
Bul dúnyadan ótip ketpesimnen burın shadlanayın!»
Copyright information for
KaaIBT22L