Psalms 39
1Atqarıwshılardıń jetekshisine. Dawıttıń jırı2Sabır etip kúttim Jaratqan Iyeni,
Ol maǵan burılıp, jalbarınıwımdı esitti.
3Meni ólim shuqırınan,
Batpaqlıqtan shıǵarıp aldı.
Ayaqlarımdı tastıń ústine bastırdı,
Qádemlerimdi bekkemledi.
4Awzıma jańa bir qosıq,
Qudayımızǵa arnalǵan alǵıs saldı.
Kópler bunı kórip, qorqar,
Jaratqan Iyege úmit baylar.
5Qanday baxıtlı Jaratqan Iyege úmit baylaǵan,
Menmen hám ótirikshilerge súyenbeytuǵın.
6Jaratqan Iye, Qudayım,
Bizler ushın ájayıp isleriń hám niyetleriń kópdur,
Hesh bir zat Saǵan teń kele almas,
Bulardı tilge alıp, sóyley baslasam,
Kópliginen sanap tawısa almaspan.
7Sen qurbanlıq hám sadaqalardı qálemediń,
Jandırılatuǵın hám gúna qurbanlıqların talap qılmadıń,
Biraq boysınıwım ushın qulaqlarımdı ashtıń.
8Sonda men bılay dedim: «Mine, men keldim,
Orama kitapta men haqqında jazılǵan.
9Seniń erkińdi orınlawdan ráhátlenemen, Qudayım,
Júregimniń tórindedur Seniń nızamıń».
10Ullı jámiyetińde ádilligińdi járiya qıldım,
Jaratqan Iye, Óziń bileseń,
Tilimdi hesh tıymadım.
11Ádilligińdi ishimde saqlamadım,
Isenimli ekenińdi hám qutqarǵanıńdı járiyaladım,
Miyrim-shápáátińdi, sadıqlıǵıńdı,
Ullı jámiyettiń aldında sır tutpadım.
12Jaratqan Iye, rehimińdi ayama mennen,
Súyispenshiligiń hám sadıqlıǵıń meni máńgi qorǵasın.
13Sansız apatlar orap aldı átirapımdı,
Gúnalarım basıma jetti, kózim kórmeydi,
Bular shashımnan kópdur,
Endi júreksiz bolıp qaldım.
14Jaratqan Iye, maǵan miyrimiń tússin, qutqar meni!
Jaratqan Iye, maǵan járdem beriwge asıq!
15Janımdı alıwǵa umtılǵanlardıń hámmesi,
Shermende bolıp, uyatqa qalsın!
Maǵan zıyan tiygiziwdi qálegenler,
Masqara bolıp, keynine qaytsın!
16«Hay-hay!» dep meni masqaralaǵanlar,
Shermende bolıp, sasqalaqlap qalsın.
17Seni izlegenlerdiń hámmesi,
Sende shadlıq hám quwanıshqa tolsın.
Seniń qutqarıwıńdı súygenler:
«Jaratqan Iye ullıdur!» – dep bárqulla aytıp júrsin!
18Men biyshara hám ǵárippen,
Biraq ǵamxorlıq qılar maǵan Iyem.
Járdemshim hám qutqarıwshım Ózińseń,
Keshikpe, Qudayım!
Copyright information for
KaaIBT22L