Psalms 41
1Atqarıwshılardıń jetekshisine. Qorax áwladınıń ▼ násiyat jırı2Suwın aǵın suwdı qalay ańsasa,
Quday, meniń janım da Seni solay ańsaydı!
3Janım Qudayǵa, tiri Qudayǵa shólleydi,
Qashan baraman Qudaydıń júzin kóriwge?
4Hár kúni: «Qudayıń qay jerde?» – degeni ushın,
Kóz jaslarım azıǵım boldı kúni-túni.
5Júrer edim alaman arasında,
Barar edim Qudaydıń Úyine.
Bayramdı belgiler edik kópshilik penen,
Quwanısh hám alǵıs jańǵırıǵı menen.
Usılar tússe yadıma, sırqıraydı júregim.
6Ne ushın túskinlikke túseseń, háy janım?
Ne ushın tınıshsızlanasań?
Qudayǵa úmit bayla,
Men Oǵan jáne alǵıs aytaman,
Qutqarıwshım hám Qudayıma.
7Túskinlikke túsip ketkenmen,
Sonıń ushın, Qudayım, Seni Iordan boyında,
Xermon hám Misar tawlarında esleymen.
8Gúrkiregen teńizlerdey,
Gúwildegen bulaqlarday,
Seniń jibergen qúdiretli tolqınlarıń,
Basıp ótti ústimnen meniń.
9Kúndiz Jaratqan Iye kórseter súyispenshiligin,
Túnde Oǵan arnap qosıq aytaman.
Ómirim bolǵan Qudayǵa duwa etemen.
10Qorǵawshı jartasım bolǵan Qudayǵa bılay deymen:
«Ne ushın meni umıttıń?
Dushpanlarımnıń zulımınan,
Ne ushın qayǵı-ǵam shegip júriwim kerek?»
11Kúni boyı dushpanlarım: «Qay jerde Qudayıń?» dep,
Meni kemsitkende, sırqıraydı súyeklerim.
12Ne ushın túskinlikke túseseń, háy janım?
Ne ushın tınıshsızlanasań?
Qudayǵa úmit bayla,
Men Oǵan jáne alǵıs aytaman,
Qutqarıwshım hám Qudayıma.
Copyright information for
KaaIBT22L