‏ Psalms 43

1Atqarıwshılardıń jetekshisine. Qorax áwladınıń násiyat jırı
2Quday, qulaqlarımız benen esittik,
Áyyemgi zamanda, ata-babalarımızdıń dáwirinde,
Aytıp berdi olar islegen isleriń haqqında.
3Óz qolıń menen quwıp shıǵıp basqa milletlerdi,
Ata-babalarımızǵa jer berdiń,
Sol xalıqlardı qırıp tasladıń.
4Shınında, olar jerdi qılısh penen almadı,
Óz qolları menen jeńiske erispedi,
Al Seniń oń qolıń, qúdiretiń,
Júzińniń nurı menen jeńiske eristi.
Olardan Seniń kewliń tolǵan edi.

5Quday, Sen patshamsań,
Buyır, Yaqıptıń urpaǵı jeńsin!
6Seniń sayańda dushpanımızdı súzip shıǵaramız,
Bizge qarsı bolǵanlardı atıń menen basqılap taslaymız.
7Men óz sadaǵıma isenbespen,
Qılıshım da jeńis alıp kelmes maǵan.
8Dushpanlarımızdan qutqarǵan Senseń,
Bizlerdi jek kóretuǵınlardı shermende qıldıń.
9Kúni boyı Qudayımız benen maqtanamız,
Máńgi alǵıslaymız Seniń atıńdı. Selah

10Biraq Sen bizlerdi taslap ketip, shermende qıldıń,
Áskerlerimiz benen sawashqa shıqpay qoydıń.
11Dushpanlarımızdıń aldında shegindirdiń,
Jek kóretuǵınlar bizlerdi arqayın tonap ketti.
12Bizlerdi soyılatuǵın qoyday qıldıń,
Milletler arasına daǵıtıp jiberdiń.
13Xalqıńdı arzan bahaǵa sattıń,
Olardıń bahasın joqarılatpadıń.
14Qońsı xalıqlarǵa bizlerdi shermende qıldıń,
Dógeregimizdegilerge masqara hám kúlki qıldıń.
15Milletlerge ápsana ettiń,
Xalıqlar bizge basın shayqar.
16Kúni boyı masqarashılıq meniń aldımda,
Shermendelik júzimdi qaplaǵan.
17Esitetuǵınımız masqara sóz, kóretuǵınımız xorlıq,
Kóz aldımızda ósh alıwshı dushpanlar.

18Bulardıń barlıǵı basımızǵa tústi,
Biraq bizler Seni umıtpadıq,
Kelisimińdi buzbadıq.
19Júregimiz Sennen júz burmadı,
Seniń jollarıńnan shetke shıqpadıq.
20Bizlerdi saǵallar mákanında ezip tasladıń,
Ústimizge tas túnek qarańǵılıqtı jawdıń.

21Eger bizler Qudayımızdıń atın umıtqanımızda,
Basqa qudaylarǵa qollarımızdı jayǵanımızda,
22Onda Quday bunı bilmes pe edi?
Ol júrektegi sırlardı biledi.
23Sen sebepli kúni boyı bizlerdi óltiredi,
Shalınatuǵın qoy dep, bizlerdi esaplaydı.

24Tur, Iye! Nege uyıqlap atırsań?
Oyan, máńgige bizlerdi taslap ketpe!
25Ne ushın júzińdi jasırıp atırsań?
Qayǵı hám azaplarımızdı ne ushın umıtasań?

26Bizler topıraqta jatırmız,
Denemiz jerge jabısıp qaldı.
27Tur, járdem ber bizlerge,
Súyispenshiligiń haqı qutqar bizlerdi!