Psalms 44
1Atqarıwshılardıń jetekshisine. «Lala gúl» namasına aytıladı. Qorax áwladınıń násiyat jırı. Muhabbat qosıǵı2Júregimnen gózzal sózler tógildi,
Patshaǵa arnayman qosıǵımdı,
Tilim sheber jazıwshınıń qálemindey bolsın.
3Adam ulları arasındaǵı eń sulıwısań,
Miyrim tógiler tilińnen.
Awa, Quday seni máńgi jarılqaǵan.
4Háy batır, dańqıń hám saltanatıń menen,
Belińe qılıshıńdı bayla.
5Ullılıǵıń menen atlanıp, alǵa bas,
Haqıyqat, kishipeyillik hám ádalat ushın jeńiske eris!
Oń qolıń tań qalarlıq isler kórsetsin.
6Patshanıń dushpanlarınıń júregin,
Ótkir oqlarıń tesip óter.
Xalıqlar ayaqlarıńnıń astına jıǵılar.
7Quday, taxtıń máńgi-baqıy turar,
Seniń patshalıq hasań – ádalat hasasıdur.
8Sen ádillikti súyip, jawızlıqtı jek kóreseń,
Sonıń ushın, Quday, seniń Qudayıń,
Doslarıńnan góre kóbirek seni,
Quwanısh mayı menen mayladı.
9Barlıq kiyimińnen mirra, aloe hám kassiyanıń xosh iyisleri shıǵadı,
Pil súyeginen bezelgen saraylarda tarlı ásbaplardıń hawazı,
Seniń kewlińdi kóteredi!
10Patsha qızları izzetli hayallarıń arasında,
Ofir altınları menen bezelgen xanbiyke turar oń jaǵıńda.
11Tıńla, háy qız, qara, qulaq sal,
Xalqıńdı hám ákeńniń úyin umıt.
12Patsha seniń gózzallıǵıńa háwes,
Xojayınıń bolǵanı ushın, aldında tájim qıl.
13Qız Tir sawǵalar alıp keler,
Xalıqtıń bay adamları miyrimińe erisiwdi qáler.
14Sarayǵa kirip kiyatırǵan sol qız qanday gózzal,
Kiyimleri bezelgen altın sabaq penen.
15Naǵıslı kiyimde onı alıp keler patsha aldına,
Onıń artınan qızlar, onıń dosları erip keler.
16Olar quwanısh hám shadlıq penen alıp keliner,
Patshanıń sarayına kirip keler.
17Babalarıńnıń ornın ullarıń alsın,
Olardı hákim etip qoyarsań pútkil úlkege.
18Atıńdı áwladtan-áwladqa umıtılmas qılaman,
Solay etip, xalıqlar seni máńgi alǵıslaydı.
Copyright information for
KaaIBT22L