‏ Psalms 48

1Atqarıwshılardıń jetekshisine. Qorax áwladınıń jırı
2Tıńlań, háy, barlıq xalıqlar!
Qulaq salıń hámmeńiz, jer júzinde jasaytuǵınlar,
3Ápiwayı hám aqsúyekler, bay hám jarlılar!
4Awzımnan shıǵar danalıq sózler,
Kewlimdegi pikirim túsinik berer.
5Qulaq túremen hikmetli sózlerge,
Lira menen mánisin ashıp beremen.

6Ne ushın qorqaman apat kúnlerde,
Niyeti buzıq dushpanlarım meni qorshap alǵanda?
7Olar óz mal-dúnyasına isener,
Esapsız baylıqları menen maqtanar.
8Hesh kim birewdiń ómiriniń tólemin ótey almas,
Ol ushın Qudayǵa qun tóley almas.
9Adam ómiriniń tólemi qımbat,
Hesh kim hesh qashan ótey almas.
10Olay bolmaǵanda, máńgi jasar edi adamzat,
Kórmes edi qábir júzin.

11Hámme biler danalardıń da óletuǵının,
Aqmaq hám biymáni adamlardıń joq bolatuǵının.
Olardıń baylıǵın basqalar iyeler.
12Jerlerine óz atların qoysa da,
Qábirleri máńgi úyi bolıp,
Áwladtan-áwladqa mákanı bolar.
13Abıraylı insan da máńgi turmas,
Ólip ketetuǵın haywanǵa megzer.
14Ózine isengenlerdiń aqıbeti,
Olardıń sózin maqullaǵanlardıń táǵdiri mınaday bolar: Selah
15Súriw sıyaqlı óliler mákanına aydalar,
Ólim olardıń shopanı bolar.
Tańda haq adamlar olarǵa húkimdarlıq qılar,
Deneleri shirip keter,
Óliler mákanı olardıń úyi bolar.
16Biraq Quday meni óliler mákanınıń qolınan qutqarar,
Ol meni Óz dárgayına alar. Selah

17Qorqpa, eger bir adam bayıp ketse,
Úyiniń mal-dúnyası artıp ketse.
18Ol ólgende, ózi menen hesh nárse alıp kete almas,
Baylıǵı da onıń izinen qábirge erip ketpes.
19Tiri waqtında, ol ózin baxıtlı sanasa da,
Tabıslı bolǵanı ushın kóplerden maqtaw alsa da,
20Ol da ata-babaları jatqan jerge ketip,
Jaqtılıqtı artıq kórmes.
21Abıraylı bolsa da, aqılsız bolǵanlar,
Ólip ketetuǵın haywanlarǵa megzer.