‏ Psalms 49

1Asaftıń ▼

▼ 1Jln 6:31-33, 39-43; 25:1-2; Ezr 2:41.

jırı
Qúdiretli bolǵan Quday, Jaratqan Iye sóyler,
Kúnshıǵıstan, batısqa deyin,
Pútkil jer júzin shaqırar.
2Gózzallıqta minsiz Sionnan,
Quday jarqırap keler.

3Qudayımız keler, únsiz bolmas,
Aldındaǵı janıp turǵan ot hámmesin jalmaydı,
Dógereginde kúshli dawıl eser.
4Xalqın húkim qılıw ushın,
Jer hám aspandı gúwa qılıp shaqırar:
5«Jıynań aldıma sadıq qullarımdı,
Qurbanlıq shalıp, Meniń menen kelisim dúzgenlerdi».
6Kókler Onıń ádilligin járiyalar,
Húkim shıǵarıwshı Qudaydıń Ózidur. Selah

7«Háy, xalqım, tıńlań, Men sóyleymen,
Háy, Izrail, saǵan qarsı gúwalıq bereyin:
Men Qudayman, seniń Qudayıńman!
8Qurbanlıqlarıń ushın,
Hám kúndelikli jandırılatuǵın qurbanlıqlarıń ushın,
Dawa qılıp atırǵan joqpan.
9Qorańdaǵı buǵaǵa da,
Súriwińdegi tekege de zar emespen.
10Meniki toǵaydaǵı barlıq janıwarlar,
Mıń-mıńlaǵan tawlardaǵı haywanlar.
11Tawlardaǵı barlıq quslardı bilemen,
Dalalardaǵı hár bir jabayı haywan Meniki.
12Ash bolsam, soramaspan sennen,
Pútkil dúnya hám onı toltırıp turǵanlar Meniki.
13Men buǵanıń góshin jeytuǵın ba edim?
Tekeniń qanın ishetuǵın ba edim?
14Maǵan, Qudayǵa shúkirlik qurbanlıǵın usın,
Quday Taala aldında ishken antıńdı orınla.
15Azap-qayǵı kúnińde shaqır Meni,
Seni qutqaraman, sen de Meni dańqqa bóleyseń».

16Biraq Quday napák adamǵa bılay deydi:
«Ne haqıń bar qaǵıydalarım haqqında sóylewge?
Ne haqıń bar kelisimimdi awzıńa alıwǵa?
17Ózińe bergen tárbiyamdı jek kóreseń,
Sózlerimnen júz burasań.
18Urını kórgenińde, oǵan qosılasań,
Buzıqlıq qılıp atırǵanlar menen sherik bolasań.
19Awzıńdı jawızlıqqa keń ashasań,
Tiliń menen jalǵan sózler toqıysań.
20Otırıp, tuwısqanıńa qarsı sóyleyseń,
Tuwǵan-tuwısqanıńa da jala jawasań.
21Sen usılardı islediń, Men úndemedim,
Meni de ózińdey dep oyladıń.
Endi seni áshkaralap, ayıbıńdı kóz aldıńa qoyaman.

22Dıqqat salıń, háy, Qudaydı umıtqanlar!
Bolmasa, sizlerdi tilkimlep taslayman,
Qutqaratuǵın hesh kim bolmaydı sizlerdi.
23Maǵan shúkir qurbanlıǵın usınǵanlar,
Meni húrmet qılǵan boladı.
Kim óz jolın tuwrılap júrse,
Soǵan Óz qutqarıwımdı kórsetemen».