Psalms 5
1Atqarıwshılardıń jetekshisine. Nay sazında atqarılatuǵın Dawıttıń jırı2Sózlerime qulaq sal, Jaratqan Iye,
Shekken nalalarıma dıqqat awdar.
3Esite gór, járdem sorap dad salaman,
Patsham hám Qudayım, Saǵan duwa etemen.
4Tańda dawısımdı esiteseń, Jaratqan Iye,
Hár erte tańda usınaman duwamdı,
Sennen kútemen juwaptı.
5Sen jamanlıqtı xosh kórmeytuǵın Qudaysań,
Jawızlıq Seniń janıńda tura almas.
6Tákabbirler kóz aldıńda tura almas,
Barlıq napáklik qılǵanlardı jek kóreseń Sen.
7Jalǵan sóyleytuǵınlardı joq qılasań,
Jaratqan Iye, qanxor hám mákkarlardan jerkeneseń.
8Men mol súyispenshiligińniń sayasında,
Seniń Úyińe, muxaddes Ibadatxanańa kiremen,
Qorqıw menen Saǵan tájim qılıp, sıyınaman.
9Jaratqan Iye, Sen ádalatlısań,
Dushpanlarıma bola, meni jetele,
Aldımda Óz jolıńdı tegisle.
10Shınlıq joq dushpanlarımnıń sózlerinde,
Olardıń júrekleri bále-qadaǵa tolı,
Awızları ashıq bir qábir sıyaqlı,
Maylı tilleri menen jalǵan sóyleydi.
11Quday, olardı húkim etip, jazala!
Dúzgen jobaları apat keltirsin ózlerine,
Olar Saǵan qarsı bas kóterer,
Gúnaları kóp bolǵanı ushın, olardı quwıp jiber.
12Quwansın Sennen pana tapqanlar,
Olar máńgi shadlanıp baqırsın.
Atıńdı súygenler Sende yoshıw ushın,
Olardı Óziń qorǵay gór!
13Jaratqan Iye, Sen haq adamlardı jarılqaysań,
Rehimiń menen olardı qalqanday qorǵaysań.
Copyright information for
KaaIBT22L