Psalms 50
1–2Atqarıwshılardıń jetekshisine. Dawıt Bat-Sheba menen jatqannan keyin, Natan payǵambar onıń aldına kelgende ▼, Dawıttıń aytqan jırı
3Quday, rehim et maǵan,
Súyispenshiligiń menen.
Jınayatlarımdı alıp tasla,
Sheksiz miyrim-shápáátiń menen.
4Juwıp tasla ayıplarımdı,
Pákle meni gúnalarımnan.
5Bilemen qılmıslarımdı,
Gúnam hár qashan turar kóz aldımda.
6Saǵan qarsı, jalǵız Saǵan qarsı gúna isledim,
Seniń názerińde jawız bolǵan iske qol urdım.
Sonıń ushın, ayıplasań Sen haqsań,
Húkim shıǵarǵanıńda, Sen ádilseń.
7Mine, gúnakar bolıp tuwılǵanman,
Anamnıń qarnında-aq gúnakar edim.
8Sen adamnıń kewlinde shınlıq bolıwın qáleyseń,
Jan dúnyama danalıq úyret.
9Meni mayoran shóbi ▼
▼ Mayoran shóbi – bul nazbaygúl shóbine tuqımlas ósimlik.
menen pákle, taza bolayın,Juwa gór meni, qardan da appaq bolayın.
10Shadlıq hám quwanısh dawısın esittir maǵan,
Yoshsın Sen sındırǵan súyeklerim.
11Júzińdi bur gúnalarımnan,
Alıp tasla ayıplarımdı.
12Quday, mende taza júrek jarat,
Ishimdegi turaqlı ruwxtı jańala.
13Meni dárgayıńnan shıǵarıp taslama,
Muxaddes Ruwxıńdı mennen alma.
14Qaytara gór maǵan qutqarılıw shadlıǵıńdı,
Boysınıw qálewin oyata gór mende.
15Jınayatshılarǵa Seniń jolıńdı úyretemen,
Gúnakarlar qaytıp keler Saǵan.
16Keshir meni qan tókkenim ushın,
Quday, Qutqarıwshı Quday,
Seniń ádilligiń ushın shadlanıp baqıradı tilim.
17Iye, asha gór láblerimdi,
Awzım Saǵan alǵıslar aytsın.
18Sen qálemeyseń qurbanlıqlardı,
Bolmasa, Saǵan usınar edim,
Jandırılatuǵın qurbanlıqtan da kewliń tolmaydı.
19Saǵan maqul bolatuǵın qurbanlıq – ezilgen ruwxdur,
Ezilgen hám táwbe qılǵan júreklerden,
Sen júz burmassań, Quday.
20Rehim etip, Sionǵa jaqsılıq qıl,
Erusalim diywalların qaytadan tikle.
21Sonda tuwrı usınılǵan qurbanlıqlar,
Tolıǵı menen jandırılatuǵın qurbanlıqlar Saǵan maqul bolar.
Qurbanlıq ornıńda buǵalar usınılar.
Copyright information for
KaaIBT22L