‏ Psalms 54

1Atqarıwshılardıń jetekshisine. Tarlı saz ásbaplarında aytılatuǵın Dawıttıń násiyat jırı
2Quday, qulaq sal duwama,
Jalbarınıwıma itibarsız bolma.
3Qulaq salıp, tıńla meni,
Tınıshsızlanıp, azap shegemen,
4Dushpanlarımnıń dawısınan, jawızdıń zulımınan.
Olar basıma qayǵı-ǵam alıp keledi,
Ǵázeplenip, maǵan dushpanlıq qıladı.

5Júregim sızlaydı ishimde,
Ólim qorqınıshı tuwdı basıma.
6Seskeniw hám titirew bastı meni,
Qáweter qapladı denemdi.
7Sonda men: «Qánekey, kepterdey qanatlarım bolsa,
Ushıp ketip, tınıshlanar edim.
8Shınında da, alıslarǵa ketip,
Elsiz jerde mákanlar edim. Selah
9Kúshli samal hám boranlardan qashıp,
Ózime pana tabıwǵa asıǵar edim», – dedim.
10Iyem, olardı aljastır,
Olardıń jobaların buzıp jiber.
Qalada zorlıq hám jánjeldi kórip turıppan.
11Olar kúni-túni qala diywallarınıń ústinde ızǵıydı,
Jawızlıq hám apat qala ishinde júz berip atır.
12Onıń ortasında wayranshılıq bar,
Jalǵan hám hiylekerlik arımas maydanınan.

13Eger jawım meni keyise,
Bunı kótere alar edim,
Dushpanım mennen ózin joqarı qoysa,
Onnan jasırınǵan bolar edim.
14Biraq sen, maǵan teńles bolǵan adam,
Dostım hám jaqınım.
15Bizler sırlas dos edik,
Qudaydıń Úyine birge barar edik.
16Ólimge duwshar bolsın dushpanlarım,
Tiriley óliler mákanına tússin,
Sebebi úyleri hám júrekleri jawızlıqqa tolıdur.

17Al men Qudaydı shaqıraman,
Jaratqan Iye qutqarar meni.
18Túnde, tańda hám kúndiz,
Jalbarınıp, dad salaman,
Ol esitedi dawısımdı.
19Maǵan qarsı shıqqanlar kóp bolsa da,
Amanlıq ishinde qutqarar janımdı.
20Ázelden taxtta otırǵan Quday, Selah
Meni esitip, olardı boysındıradı.
Olarda ózgeris joq,
Qudaydan qorqpaydı.

21Joldasım dostına qarsı qol kóterdi,
Dúzgen kelisimimizdi buzdı.
22Onıń awzınan pal tamadı,
Biraq júreginde dushpanlıq.
Sózleri maydan da jaǵımlı,
Biraq bular jalańashlanǵan qılıshdur.

23Júgińdi Jaratqan Iyege tapsır,
Ol saǵan súyenish boladı.
Hasla jol qoymas,
Haq adamnıń qulawına.

24Sen, Quday, ólim shuqırına ılaqtırasań jawızlardı,
Ómiriniń jartısın da kórmes qanxor hám qıyanetshiler.
Al men Saǵan úmit baylayman.