Psalms 58
1Atqarıwshılardıń jetekshisine. «Joq etpe» namasına aytıladı. Shaul Dawıttı óltiriw ushın, úyin ańlıwǵa adam jibergende ▼, Dawıttıń aytqan jırı2Qudayım, meni dushpanlarımnan qutqar!
Maǵan qarsı shıqqanlardan aman saqla.
3Jınayatshılardan meni saqla,
Qanxorlardan qutqar.
4Qara, olar janımdı alıw ushın, ańlıp jatır,
Jazıǵım hám gúnam bolmasa da, Jaratqan Iye,
Kúshliler maǵan qarsı birlespekte.
5Ayıbım bolmasa da,
Maǵan qarsı hújim etiwge asıǵıp atır.
Maǵan járdem beriw ushın tur, awhalıma qara!
6Sen, Álemniń Qudayı Jaratqan Iye,
Izrail xalqınıń Qudayı,
Tur, barlıq xalıqlardı jazala,
Hesh bir jawız jınayatshını ayama. Selah
7Olar keshte qaytıp keledi,
Iytlerdey ırıldasıp, qalanıń ishinde ızǵıp júredi.
8Qara, olardıń tillerinen sógis tógiledi,
Awızlarınan qılısh shıǵadı.
Olar: «Kim bizlerdi esiter edi?» – dep oylaydı.
9Biraq Sen olardıń ústinen kúleseń, Jaratqan Iye,
Barlıq xalıqlardı masqara qılasań.
10Kúsh-quwatım Senseń, Saǵan intizarman,
Sen meniń qorǵanımsań, Quday!
11Qudayım súyispenshiligi menen qarsı alar meni,
Meni ańlıǵan jawlarımnıń qulawın kórseter maǵan.
12Olardı óltirme, bolmasa xalqım umıtıp ketedi,
Qúdiretiń menen olardı gezende qılıp, tarqat,
Keyin olardı jerge ur, Iye, qalqanımız.
13Olardıń awzınan shıqqan gúnaları ushın,
Tilleri menen sóylegen sózleri ushın,
Aytqan nálet hám jalǵan sózleri ushın,
Ózleriniń menmenliginiń duzaǵına tússin.
14Ǵázebiń menen joq qıl olardı,
Birewin de qaldırmay qırıp tasla.
Sonda Qudaydıń Yaqıp urpaqlarınıń ústinen húkimdar ekenin,
Jer júziniń shetine deyin biledi. Selah
15Olar keshte qaytıp keledi,
Iytlerdey ırıldasıp, qalanıń ishinde ızǵıp júredi.
16Awqat tabıw ushın gezedi,
Túndi ash qarnı menen ótkeredi.
17Al men Seniń kúsh-qúdiretińdi jırlayman,
Tań azannan súyispenshiligiń ushın shadlanıp baqıraman.
Óytkeni Sen maǵan qorǵan,
Apatta qalǵanımda, pana boldıń.
18Kúsh-quwatım meniń, saz shertip, Seni alǵıslayman,
Sen meniń qorǵanımsań,
Maǵan súyispenshilik kórsetken Qudayımsań.
Copyright information for
KaaIBT22L