Psalms 64
1Atqarıwshılardıń jetekshisine. Dawıttıń jırı. Qosıq2Quday, Sionda alǵıs-maqtaw Saǵan tiyisli,
Saǵan berilgen antlar orınlanadı.
3Sen duwalarımızdı esiteseń,
Barlıq adamzat Saǵan keledi.
4Gúna awırmanlıǵınan qıynalıp júrgende,
Sen qılmıslarımızdı keshireseń.
5Qanday baxıtlı háwlilerińde jasawı ushın,
Sen tańlaǵan, Ózińe jaqınlatqan adam!
Úyińniń, muxaddes Ibadatxanańnıń,
Jaqsı jemislerine toyamız.
6Qutqarıwshımız Quday, haqlıǵıń menen,
Tań qalarlıq isleriń menen bizlerge juwap ber.
Sen jer júziniń tórt tárepiniń,
Uzaq teńizlerdiń úmitiseń.
7Kúsh-qúdiret penen qurallanǵansań,
Óz kúshiń menen tawlardı jaylastırǵansań.
8Teńizlerdiń hám olardıń tolqınlarınıń shawqımın,
Jáne de, xalıqlardıń qozǵalańın tınıshlandırasań.
9Dúnyanıń arǵı shetinde jasaytuǵınlar,
Káramatlı belgilerińdi kórip qorqıwǵa túser.
Shıǵıstan batısqa deyingi xalıqlardı,
Quwanıshlı dawıslarǵa toltırasań.
10Jerge ǵamxorlıq qılıp, onıń shólin qandırasań,
Onı moldan bayıtasań.
Quday, Seniń salmalarıń suwǵa tolı,
Adamlarǵa ǵálle bereseń,
Jerdi soǵan tayarlaǵansań.
11Qarıqların qandırıp, suwǵarasań,
Biyik jerlerin tegisleyseń.
Jawınıń menen onı jumsartasań,
Onıń ónimin bereketli qılasań.
12Iygiligiń menen jılǵa taj kiydireseń,
Júrgen jollarıńnan baylıq aǵıp turar.
13Shól otlaq jerge aylanar,
Tóbeshikler shadlıqqa bólener.
14Jaylawlar súriwler menen qaplanar,
Oypatlıqlar dánge kiyiner,
Olar quwanıshtan baqırısıp, qosıq aytar.
Copyright information for
KaaIBT22L