‏ Psalms 65

1Atqarıwshılardıń jetekshisine. Qosıq, jır
Háy, jer júzindegi barlıq adamlar,
Bálent dawıs penen Qudayda shadlanıń!
2Onıń ullı atın saz shertip, alǵıslań,
Oǵan saltanatlı túrde alǵıs aytıń!
3Qudayǵa aytıń: «Seniń isleriń qanday qorqınıshlı!
Qúdiretińniń ullılıǵınan,
Dushpanlarıń Sennen aybınadı.
4Pútkil jer júzi Saǵan tájim qıladı,
Olar Saǵan arnap qosıq aytadı,
Awa, saz shertip, Seniń atıńdı alǵıslaydı». Selah

5Keliń, Qudaydıń ne islegenlerin kóriń!
Qanday qorqınıshlı isler isledi adamzat ushın:
6Ol teńizdi qurǵaq jerge aylandırdı ▼

▼ Shıǵ 14–15.

,
Ata-babalarımız dáryadan júrip ótti ▼

▼ Eshu 3.

,
Quwanayıq Onıń sol islerine!
7Qúdireti menen máńgi húkimdarlıq etedi,
Kózleri milletlerdi baqlap turadı.
Qozǵalańshılar menmenlikke berilmesin. Selah

8Háy, xalıqlar, Qudayımızǵa alǵıs aytıń,
Oǵan aytqan alǵıs-maqtawıńız jańlasın.
9Ol ómirimizdi saqladı,
Ayaqlarımızdıń tayıp ketiwine jol qoymadı.

10Quday, Sen bizlerdi sınadıń,
Gúmisti otta tazalaǵanday etip tazaladıń.
11Bizlerdi duzaqqa jolıqtırdıń,
Jelkemizge awır júk júklediń.
12Sawash arbaların basımızdıń ústinen júrgizdiń,
Ottan hám suwdan keship óttik,
Biraq keyin abadanshılıqqa alıp keldiń.

13Jandırılatuǵın qurbanlıqlar menen Úyińe baraman,
Bergen wádelerimdi orınlayman.
14Apatta qalǵanımda, awzımnan shıqqan edi,
Tilim menen bergen edim wádelerdi.
15Semirtilgen haywanlardı jandırılatuǵın qurbanlıqqa beremen,
Qoshqardı tútetip Saǵan usınaman.
Mal hám tekelerdi qurbanlıq etip beremen. Selah

16Keliń, tıńlań, háy, Qudaydan qorqatuǵınlar,
Men ushın Onıń ne islegenin sizlerge aytıp bereyin.
17Awzım menen Onı shaqırdım,
Tilim menen Onı ullıladım.
18Eger júregimde jawız niyet bolsa,
Onda Iye meni esitpes edi.
19Biraq Quday tıńladı meni,
Duwa etkenimde, dawısıma qulaq saldı.
20Alǵıslar bolsın Qudayǵa,
Ol duwamnan bas tartpadı,
Súyispenshiligin mennen ayamadı.