‏ Psalms 68

1Atqarıwshılardıń jetekshisine. «Lala gúl» namasına aytıladı. Dawıttıń jırı
2Quday, qutqar meni,
Suwlar alqımıma keldi.
3Shógip baratırman túpsiz batpaqqa,
Ayaǵımdı basatuǵın qattı jer joq.
Tereń suwlarǵa shógip kettim,
Kúshli aǵıs meni tartıp ketpekte.
4Dad salıwdan dińkem qurıdı,
Tamaǵım kewip qaldı,
Qudayımdı kútip, kóz nurım sóndi.

5Sebepsiz meni jek kóretuǵınlar,
Basımdaǵı shashımnan da kópdur.
Dushpanlarım maǵan qarsı jalǵan sóyler,
Olar kúshli, meni óltirmekshi,
Urlamaǵan nársemdi qaytarıwdı talap qılar.
6Quday, aqılsızlıǵımdı Óziń bileseń,
Ayıplarım Sennen jasırın emes.

7Quday, Álemniń Iyesi,
Men sebepli uyatqa qalmasın Saǵan úmit qılǵanlar!
Izraildıń Qudayı,
Seni izlegenler men sebepli shermende bolmasın!
8Sen ushın shıdayman sógislerge,
Shermendelik qaplaydı júzimdi.
9Aǵa-inilerime jat adamday boldım,
Anamnıń ulları ushın kelgindi sıyaqlıman.

10Seniń Úyińe bolǵan ıqlasım ishimdi jeydi,
Seni aqıretlegenler meni aqıretlegen boladı.
11Oraza tutıp, dad salsam,
Men masqara bolaman.
12Aza kiyim kiysem,
Olar ushın ápsana bolaman.
13Qala dárwazası janında otırǵanlar,
Men tuwralı ósek toqıydı.
Máskúnemler meni mısqıllap, qosıq aytadı.

14Biraq men Saǵan duwa etemen, Jaratqan Iye,
Maqul waqıtta, ullı súyispenshiligińniń sayasında, Quday,
Isenimli qutqarıwıń menen juwap ber maǵan.
15Meni qutqar, batpaqqa batıp ketpeyin,
Meni jek kóretuǵınlardan azat qıl,
Tereń suwlardan meni saqlap qal.
16Kúshli aǵıs meni tartıp ketpesin,
Túpsiz suwlar meni jutpasın,
Qábir ústimnen awzın jappasın.

17Juwap ber maǵan, Jaratqan Iye,
Iygiliklidur súyispenshiligiń.
Ullı rehimiń sebepli maǵan qaray burıl.
18Óz qulıńnan júzińdi jasırma,
Apat ishinde qaldım, tez juwap ber maǵan!
19Jaqınlap maǵan, qutqar janımdı,
Dushpanlarımnan azat et meni.

20Meni qanday masqara qılǵanın,
Shermende bolıp, uyatqa qalǵanımdı bileseń,
Dushpanlarımnıń hámmesi Seniń qarsıńda.
21Keyisler kewlimdi jaraqatladı, dártke tolǵanman,
Dártlesetuǵın birewdi izledim, hesh kim joq,
Jigerlendiretuǵın birewdi izledim, onı da tappadım.
22Awqatıma olar záhár saldı,
Shóllegenimde, maǵan sirke suwın berdi.

23Aldındaǵı dasturxanı ózlerine qaqpan bolsın,
Dosları ushın duzaq bolsın!
24Kózlerin qarańǵılıq basıp, kórmey qalsın,
Belleri máńgige búgilip qalsın.
25Ashıwıńdı tók olardıń ústine,
Lawlaǵan ǵázebiń olardı jutsın!
26Olardıń mákanı qańırap qalsın,
Shatırlarında jasaytuǵın hesh kim qalmasın!
27Olar Sen urǵan adamlardı quwǵın qılar,
Sen jaraqatlaǵan adamlardıń jarasın ósek qılar.
28Gúnaları ústine gúna qosa gór,
Sen olardı aqlama.
29Atları ómir kitabınan óshirilsin,
Haq adamlar menen birge jazılmasın!

30Men biysharaman hám azap shegip atırman,
Quday, qutqar meni hám qáwipsiz jerde saqla!
31Qudaydıń atın qosıq aytıp maqtayman,
Shúkirlik penen Onı ullılayman.
32Bul shaqlı hám tuyaqlı buǵa yamasa tanadan góre,
Jaratqan Iyege kóbirek maqul boladı.
33Ezilgenler bunı kórip, quwansın,
Háy, Qudaydı izlegenler, júregińiz janlansın!
34Jaratqan Iye mútájlerdi esitedi,
Tutqın bolǵan xalqın jek kórmeydi.

35Oǵan alǵıs-maqtaw aytıń, háy, aspan hám jer,
Teńizler hám ondaǵı barlıq janıwarlar.
36Quday Siondı qutqaradı,
Yahuda qalaların qayta tikleydi,
Xalıq ornalasıp, ol jerdi iyeleydi.
37Onıń qullarınıń urpaǵı jerdi miyras qıladı,
Onıń atın súygenler ol jerge mákan basadı.