‏ Psalms 70

(Zab 30:1-4)

1Jaratqan Iye, Seni panalayman,
Meni hasla shermende qılma!
2Ádalatlıǵıń menen qutqarıp, azat qıl meni!
Maǵan qulaǵıńdı túrip, qutqar meni!
3Panalaytuǵın jartasım bol,
Hámme waqıtta panalawǵa ol jerge bara alayın.
Meni qutqarıw ushın buyrıq ber,
Shınında da, Sen jartasım hám qorǵanımsań.

4Qudayım, meni jawızlardıń qolınan,
Ádalatsız hám zalım adamnıń pánjesinen qutqar!
5Sen meniń úmitimseń, Quday Iye,
Jaslıǵımnan Saǵan isenemen.
6Tuwılǵanımnan baslap, Saǵan súyendim,
Meni anamnıń qarnınan Sen alıp shıqtıń,
Hámme waqıtta Saǵan alǵıs-maqtaw aytaman.

7Kópler ushın órnek boldım,
Sen meniń bekkem panamsań.
8Awzım tolıp tassın alǵıs-maqtawǵa,
Kúni boyı saltanatıńdı járiyalayman.
9Qartayǵan shaǵımda, mennen júz burma,
Kúshim qaytqannan keyin, meni tárk etpe!
10Dushpanlarım maǵan qarsı til biriktirer,
Meni óltiriwdi qálegenler bir-biri menen keńeser.
11Olar: «Quday onı tárk etti,
Quwıp, uslap alıńlar,
Onı qutqaratuǵın hesh kim joq!» – deydi.

12Quday, mennen uzaqlaspa,
Qudayım, maǵan járdem beriwge asıq!
13Shermende bolıp, joq bolsın, meni ayıplawshılar,
Maǵan jawızlıq qılmaqshı bolǵanlar,
Uyatqa qalıp, biyabıray bolsın.
14Al men hámme waqıtta Sennen úmit qılaman,
Ústi-ústine Saǵan alǵıs aytaman.
15Kúni boyı Seniń ádil islerińdi,
Qutqarıwıń tuwrısında járiyalayman,
Olardı sanap, ada bolmaspan.
16Quday Iye, qúdiretiń sebepli kelemen,
Seniń, jalǵız Seniń ádilligińdi bayan qılaman.

17Quday, jaslıǵımnan maǵan Sen tálim berdiń,
Elege deyin, Seniń ájayıp islerińdi aytıp júremen.
18Shashlarım aǵarıp, qartayǵanımda da,
Tárk etpe meni, Quday!
Kúshińdi keleshek áwladqa,
Qúdiretińdi keyingi urpaqlarǵa jetkereyin.

19Quday, kóklerge jeter ádilligiń,
Ullı isler qıldıń Sen,
Saǵan uqsaǵan kim bar, Quday?
20Sen maǵan kóp awır apatlar jiberdiń,
Biraq meni qaytadan janlandırasań,
Meni jerdiń túbinen jáne shıǵarıp alasań.
21Abırayımdı joqarılatasań,
Maǵan jáne jubanısh bereseń.

22Men de arfa shertip, Saǵan alǵıs aytaman,
Sadıqlıǵıńdı qosıq etip aytaman, Qudayım.
Lira shertip, Saǵan alǵıs aytaman, Izraildıń Muxaddesi!
23Saz shertip, Saǵan alǵıs aytqanımda,
Awzımnan shadlıq dawısı shıǵıp,
Óziń qutqarǵan janım quwanadı.
24Tilim kúni boyı Seniń ádalatıń haqqında járiyalaydı,
Maǵan jawızlıq qılıwdı qálegenler,
Uyatqa qalıp, shermende boldı.