‏ Psalms 71

1Sulaymannıń jırı
Quday, húkim shıǵarıwdı patshaǵa,
Ádalatlıǵıńdı patshanıń ulına sıyla.
2Ol Seniń xalqıńdı ádalatlıq penen,
Ǵáriplerińdi tuwrılıq penen húkim qılsın!
3Tawlar xalıqqa abadanshılıq,
Tóbeshikler haqıyqatlıq alıp kelsin.
4Patsha jarlılardı qorǵasın,
Kámbaǵallardıń balaların qutqarsın,
Zalımlardı ezip taslasın.
5Quyash hám ay turǵanınday,
Xalqıń áwladtan-áwladqa Sennen qorqıp jasasın.
6Patshamız jańa orılǵan atızǵa jawǵan jawınday,
Topıraqtı suwǵaratuǵın bereketli jawınday bolsın.
7Onıń dáwirinde haq adam gúllep, jasnasın,
Ay joq bolıp ketpegenshe, abadanshılıq mol bolsın.

8Ol húkimdarlıq etsin bir teńizden ekinshi teńizge deyin,
Evfrat dáryasınan jer júziniń shetine deyin!
9Onıń aldında shólde jasaytuǵınlar bas iysin,
Dushpanları topıraq jalasın.
10Tarshish hám ataw úlkeleriniń patshaları,
Oǵan salıq alıp kelsin.
Sheba hám Seba patshalıqları sawǵalar usınsın.
11Barlıq patshalar aldında tájim qılsın,
Pútkil xalıqlar oǵan xızmet etsin!

12Ol nala shekken jarlıǵa járdem berer,
Súyenishi joq biysharanı qutqarar.
13Ǵárip hám jarlıǵa rehimi keler,
Jarlılardıń janın qutqarar.
14Zorlıq hám zulımlıqtan olardı azat qılar,
Olardıń qanı onıń názerinde ázizdur.

15Patshanıń ómiri uzaq bolsın!
Shebanıń altını oǵan berilsin,
Tınımsız duwa etilsin ol ushın,
Kúni boyı onı jarılqasın!
16Úlkede dán mol bolsın,
Taw baslarında dán ónimleri shayqalıp tursın!
Masaqları Lebanon toǵayınday mol bolsın,
Qala xalqı jerdegi shóp yańlı kóbeysin!
17Patshanıń atı máńgi jasasın,
Quyash sóngenshe, atı óshpesin,
Ol arqalı adamlar jarılqansın,
Pútkil xalıqlar: «Ol qanday baxıtlı», – dep aytsın!

18Jaratqan Iye Qudayǵa, Izraildıń Qudayına alǵıslar bolsın.
Káramatlar isleytuǵın jalǵız Oldur.
19Onıń ullı atına máńgi alǵıslar bolsın,
Pútkil jer júzi Onıń dańqına tolsın!
Awmiyin! Awmiyin!

20Ishay ulı Dawıttıń duwaları usı jerde tamamlandı.