‏ Psalms 72

1Asaftıń jırı
Quday haqıyqattan da Izrailǵa,
Júregi pák bolǵanlarǵa iygilikli.
2Ayaqlarım tayıp kete jazladı,
Sırǵanap jıǵılıwdan sál qaldım.
3Jawızlardıń abadanshılıǵın kórip,
Sol menmenlerge ishim kúydi.

4Olar ómiriniń aqırına deyin, qayǵı ne ekenin bilmes,
Deneleri saw-salamat.
5Adamzatta bolatuǵın qıyınshılıqtı kórmes,
Basqalar sıyaqlı azap shekpes.
6Menmenlik olardıń moynındaǵı monshaǵı,
Jawızlıq ústindegi kiyimi sıyaqlı.
7Olardıń kózlerin may basqan,
Júrekleri tákabbirlikke tolıp tasqan.
8Adamlardıń ústinen kúlip, jawız niyette sóyler,
Menmenlik etip, zulımlıq qılıwdı jobalastırar.
9Kóklerge qarsı awzın ashar,
Tilleri menen jer júzin iyeler.
10Sonıń ushın, xalıq solarǵa qaray júz burar,
Sózlerin bolsa, suwday etip iship alar.
11Olar bılay deydi: «Quday qalay biledi?
Quday Taalanıń xabarı bar ma edi?»
12Mine, usındaydur jawızlar,
Hámme waqıtta táshiwishsiz jasar,
Óz baylıǵın arttırar.

13Men biykarǵa júregimdi pák tutqan ekenmen-dá,
Ayıpsızban, dep qollarımdı juwǵan ekenmen-dá.
14Kúni boyı azap shegemen,
Hár kúni azanda jazalanaman.

15Men de olar sıyaqlı sóyleyin, desem,
Qıyanet etken bolaman Seniń haqıyqıy xalqıńa.
16Bulardı túsiniw ushın oylanǵanımda,
Men ushın qıyın boldı bul.
17Seniń muxaddes Ibadatxanańa kiremen degenshe,
Túsinbegen edim olardıń aqıreti ne bolatuǵının.

18Shınında da, olardı tayǵaq jerge qoyǵansań,
Jerge qulatıp, wayran qılasań.
19Olar kútilmegende birden qırılıp qaladı,
Qorqınıshlı apat ishinde pútkilley joq boladı.
20Oyanǵanda umıtılıp ketetuǵın tús sıyaqlı,
Sen qozǵalǵanda, Iye,
Olardı eles súlderdey kórip, mensinbeyseń.

21Júregim ǵamǵa tolıp,
Qálbimde dárt payda bolǵanda,
22Men nadan bolıp, bilmegen ekenmen,
Saǵan haywanday qatnasta boldım.
23Sonda da hámme waqıtta Seniń menen birgemen,
Meniń oń qolımnan uslaǵansań.
24Násiyatlarıń menen maǵan jol kórseteseń,
Keyin meni dańqqa qaray jeteleyseń.
25Sennen basqa kimim bar aspanda?
Sennen basqanı qálemeymen jer júzinde.
26Denem hám qálbim hálsirep baratır,
Biraq Quday – Sen júregimniń kúsh-quwatısań,
Meniń máńgilik úlesimseń.

27Sennen uzaqlasqanlar ólip ketedi,
Qırıp taslaysań Saǵan opasızlıq qılǵanlardı.
28Al men ushın Quday, Saǵan jaqın bolıw jaqsı,
Barlıq islerińdi járiyalayın dep,
Quday Iye, Seni pana qılıp aldım ózime.