‏ Psalms 73

1Asaftıń násiyat jırı
Quday, ne ushın bizlerden máńgi bas tarttıń?
Ne ushın Óziń baǵıp atırǵan qoylarǵa ǵázebińdi shashasań?
2Esle ótmishtegi iyelik qılǵan jámiyetińdi,
Óz xalqıń qılıw ushın azat etken qáwimińdi,
Óziń mákan qurǵan usı Sion tawın.
3Adımlarıńdı tiklenbey turǵan qarabaqanaǵa qaray bur,
Dushpan Muxaddes orındaǵı barlıq nárseni qıyrattı.

4Ibadatxanańda dushpanlarıń qıshqırıstı,
Ol jerge óz bayraqların tikti.
5Olar toǵayda terek shabıw ushın,
Baltasın kótergen adamǵa uqsaydı.
6Keyin olar ay balta hám balǵaları menen,
Qıyratıp tasladı barlıq oyma islerdi.
7Muxaddes mákanıńdı órtedi,
Atıń ornalasqan mákanıńdı pútkilley haramladı.
8Olar óz kewlinde: «Olardı pútkilley qurtamız», – dep,
Eldegi sıyınıw orınların órtep jiberdi.

9Káramatlı belgilerińdi kórmeymiz,
Endi payǵambarlar da qalmadı,
Bul qashanǵa deyin dawam etetuǵının biletuǵın,
Hesh kim qalmadı bizlerdiń aramızda.
10Quday, qashanǵa deyin dushpan Seni aqıretleydi?
Jaw Seniń atıńa máńgige til tiygize ala ma?
11Ne ushın qolıńdı, oń qolıńdı artqa tartasań?
Qoynıńnan qolıńdı shıǵarıp, olardı qırıp tasla!

12Quday, ázelden meniń patshamsań,
Jer júzine jeńis alıp keleseń.
13Kúshiń menen teńizdi ekige bóldiń,
Teńiz aydarhalarınıń basların suw ishinde ezdiń.
14Liwyatannıń ▼

▼ Liwyatan – teńizde jasaytuǵın úlken maqluq.

basların ezdiń,
Shólde jasaytuǵınlarǵa onı azıq qılıp berdiń.
15Suwdıń kózlerin hám bulaqlardı ashıp aǵızǵan Senseń,
Aǵıp turǵan dáryalardı qurǵatıp taslaǵan Senseń.
16Kúndiz Seniki, tún de Seniki,
Ay hám quyashtı Sen ornattıń.
17Sen jer júziniń barlıq shegaraların ornattıń,
Jazdı da, qıstı da Óziń jarattıń.

18Esińde tut, Jaratqan Iye, dushpan aqıretlep atır,
Aqmaq xalıqlar atıńa til tiygizip atır.
19Qumırıńnıń janın jırtqıshlarǵa tapsırma,
Biyshara bendelerińdi máńgige umıtpa.

20Dúzgen kelisimińe názer sal,
Eldiń qarańǵı jerleri zorlıqqa tolǵan.
21Ezilgen adam shermende bolıp qaytpasın,
Biyshara hám jarlılar atıńa alǵıs-maqtaw aytsın.

22Tur, Quday, Óz isińdi qorǵa,
Aqmaqlardıń kúni boyı Seni masqara qılıwın esle.
23Dushpanlarıńnıń qıshqırıǵın,
Saǵan qarsı shıqqanlardıń tınbay kóterilgen shawqımın umıtpa.