‏ Psalms 76

1Atqarıwshılardıń jetekshisi Edutun ushın. Asaftıń jırı
2Dawıslap Qudayǵa jalbarınaman,
Dawıslap Qudaydı shaqıraman,
Ol meni esitedi.
3Qıyın kúnimde Iyeni izledim,
Túni menen qollarımdı túsirmey jaydım,
Kewlim bas tarttı jubanıshtan.
4Qudaydı eslesem, ah uraman,
Oy juwırtsam, ruwxım hálsireydi. Selah

5Kózlerime uyqı bermeyseń,
Háwlirip ketkenlikten, sóyley almayman.
6Ótmishtegi kúnler haqqında,
Ótken jıllar haqqında oylayman.
7Túnde aytqan qosıqlarımdı eske alaman,
Ózim menen ózim sóylesip,
Ruwxım sorawlarǵa juwap izler:
8Iye bizlerden máńgi bas tarttı ma?
Endi qaytıp hesh qashan maǵan miyrimiń túspey me?
9Onıń súyispenshiligi máńgi joq bolǵanı ma?
Bergen sózi áwladtan-áwladqa dawam etpey me?
10Quday rehim etiwdi umıtqanı ma?
Miyrim-shápáátiniń ornın ǵázep basqanı ma? Selah
11Ózime ózim bılay dedim:
«Mine, meniń dártim –
Quday Taalanıń Óz kúshin kórsetpewi».

12Jaratqan Iye, Seniń islerińdi eske alaman,
Burınǵı káramatlarıńdı esleymen.
13Seniń barlıq islerińdi túsiniwge tırısaman,
Ullı isleriń ústinde oy juwırtaman.

14Quday, jolıń muxaddesdur!
Quday, Sen sıyaqlı basqa ullı quday bar ma?
15Sen – káramatlar isleytuǵın Qudaysań,
Xalıqlar arasında Óz qúdiretińdi kórsettiń.
16Óz kúshiń menen xalqıńdı,
Yaqıp hám Yusup áwladların azat qıldıń. Selah

17Suwlar Seni kórip, Quday,
Suwlar Seni kórip, qorqıp ketti.
Túpsiz teńizler titiredi.
18Bultlardan jawın quydı,
Kóklerden shaqmaq shaqtı,
Sonda Seniń oqlarıń ushtı.
19Dúbeley ishinde dawısıń gúrkiredi,
Jıldırımlar jer júzin jarıq qıldı.
Jer titirep, lárzege keldi.
20Jolıń teńiz arqalı,
Soqpaǵıń ullı suwlar arqalı ótti,
Izleriń bolsa, kórinbedi.
21Muwsa hám Xaronnıń qolları menen,
Xalqıńdı súriw sıyaqlı alıp júrdiń.