Psalms 77
1Asaftıń násiyat jırıTıńlań, háy xalqım, kórsetpelerimdi,
Meniń sózlerime qulaq túriń.
2Tımsallar aytıw ushın awzımdı ashaman,
Ótmishtegi sırlı sabaqlardı bayan etemen,
3Ne esitip, bilgenimizdi,
Ata-babalarımızdıń bizlerge aytıp bergenin.
4Balalarımızdan bulardı jasırmaymız,
Jaratqan Iyeniń dańqın, Onıń kúshin,
Onıń ájayıp islerin keleshek áwladqa bayan etemiz.
5Jaratqan Iye Yaqıp urpaǵına qaǵıydalar ornatıp,
Izrailǵa nızam tayınladı.
Bulardı balalarına úyretsin dep,
Ata-babalarımızǵa buyrıq berdi.
6Solay etip, keleshek áwladlar bilsin,
Keleshekte tuwılatuǵın balalar da,
Bulardı óz balalarına jetkersin.
7Sóytip, olar Qudayǵa úmit baylasın,
Qudaydıń islerin umıtpasın,
Onıń buyrıqların orınlasın.
8Júrekleri turaqlı bolmaǵan,
Ruwxları Qudayǵa sadıq bolmaǵan,
Ata-babaları sıyaqlı ójet, qozǵalańshı áwlad bolmasın.
9Sadaq hám oqlar menen qurallanǵan Efrayım áwladı,
Sawash kúni keynine burılıp qashtı.
10Olar Qudaydıń kelisimin saqlamadı,
Onıń nızamı boyınsha júriwden bas tarttı.
11Umıttı Onıń islerin,
Ózlerine kórsetken káramatların.
12Mısırda, Soan dalasında,
Ol káramat isledi ata-babalarınıń kóz aldında ▼,
13Teńizdi ekige bólip, olardı alıp ótti,
Suwlardı diywal sıyaqlı etip qoydı ▼.
14Kúndiz bult penen,
Túnde ottıń jaqtısı menen olardı alıp júrdi ▼.
15Shólde jartaslardı qaq ayırıp,
Teńizdey mol etip suw berdi.
16Jartastan bulaqlar ashıp,
Suwlardı dáryaday aǵızdı ▼.
17Biraq olar Onıń aldında gúna islewdi,
Shólde Quday Taalaǵa qarsı bas kóteriwdi dawam etti:
18Júreklerinde Qudaydı sınap,
Kewli kúsegen awqattı talap qıldı.
19Olar Qudayǵa qarsı sóylep, bılay dedi:
«Quday shólde dasturxan jaya ala ma?
20Mine, Ol tastı urıp, suw shıǵardı,
Suwdı dárya qılıp aǵızdı.
Endi xalqına nan bere ala ma,
Gósh penen de támiyinley ala ma?» ▼
21Jaratqan Iye bunı esitip, qattı ǵázeplendi,
Yaqıpqa qarsı otın lawlatıp,
Izrailǵa qáhárin shashtı.
22Sebebi olar Qudayǵa isenbedi,
Onıń qutqarıwınan úmit etpedi.
23Ol joqarıdaǵı bultlarǵa buyrıq berip,
Aspan qaqpaqların ashtı.
24Xalıqqa jeytuǵın manna jawdırdı,
Kóktegi dánnen berdi olarǵa.
25Adamlar perishtelerdiń nanın jedi,
Toyǵanınsha awqat jiberdi olarǵa ▼.
26Shıǵıs samalın estirdi aspanda,
Qúdireti menen qubla samalın alıp keldi.
27Shańday qılıp, olarǵa gósh,
Teńiz qumınday mol etip quslar jawdırdı.
28Olardı ordasınıń ortasına,
Mákan qılǵan jerdiń dógeregine qondırdı.
29Solay etip, xalıq toyǵanınsha jedi,
Qálegeninshe olarǵa Quday berdi.
30Biraq olardıń kúsewi qaytpay turıp,
Awqatları ele awzında eken,
31Qudaydıń ǵázebi olarǵa shashıldı,
Eń kúshlilerin óltirdi,
Jerge qulattı Izraildıń jas jigitlerin ▼.
32Buǵan qaramastan, olar dawam etti gúna islewin,
Onıń ájayıp islerine isenbedi.
33Sonıń ushın, Quday olardıń kúnlerin biyhudalıq penen,
Jılların qorqınısh ishinde aqırına jetkerdi.
34Quday olardı óltirip baslaǵanda,
Olar Onı izlep, qayta bet burdı,
Pútkil barlıǵı menen Qudaydı izledi.
35Quday – ózleriniń qorǵawshı jartası ekenin,
Quday Taala – ámeńgeri ekenin esledi.
36Biraq awızları menen Oǵan jaǵımpazlıq qıldı,
Tilleri menen Onıń aldında ótirik sóyledi.
37Onıń aldında júrekleri sadıq bolmadı,
Onıń kelisimine biyopalıq qıldı.
38Degen menen, Quday rehimli,
Gúnalardı keshiredi, gúnakarlardı joq etpeydi,
Kóp márte Óz ǵázebin basadı,
Qáhárin tolıq shashpaydı.
39Quday olardıń tánnen ibarat ekenin,
Esip ótip, qaytıp kelmeytuǵın samal ekenin esledi.
40Shólde Oǵan qarsı neshshe ret bas kóterdi,
Qula dúzde Onı qapa qıldı.
41Qayta-qayta sınadı Qudaydı,
Izraildıń Muxaddesin irenjitti.
42Eslemedi Onıń qúdiretli qolın,
Ózlerin dushpannan qutqarǵan kúnin.
43Mısırda kórsetken belgilerin,
Soan dalasında islegen káramatların.
44Sonda Mısırdıń ózeklerin qanǵa aylandırdı,
Olar suwlarınan ishe almay qaldı.
45Olarǵa shaqsın dep, iytshıbın,
Wayran qılsın dep, qurbaqalar jiberdi.
46Olardıń eginlerin hám qol miynetlerin,
Shegirtkelerge tapsırdı.
47Burshaq penen júzimzarların,
Jabayı ánjir aǵashların joq etti.
48Olardıń iri malların burshaqtıń,
Súriwlerin jıldırımnıń astında qaldırdı.
49Olardıń ústine lawlaǵan ǵázebin shashtı,
Olarǵa qáhár, ashıw hám azap,
Apat alıp keletuǵın perishtelerin jiberdi.
50Óz qáhárine jol qoydı,
Olardı ólimnen saqlamadı,
Janların illetke duwshar qıldı.
51Qırıp tasladı Mısırdaǵı barlıq tuńǵıshlardı,
Xamnıń shatırlarındaǵı belindegi kúshiniń,
Birinshi jemisi bolǵan balaların.
52Óz xalqın qoy sıyaqlı jeteklep shıqtı,
Shólde súriwdey etip baslap júrdi.
53Olardı aman-esen alıp júrdi, olar qorqpadı,
Dushpanları bolsa, teńizge ǵarq boldı ▼.
54Olardı Óziniń muxaddes jerine,
Qúdiretli oń qolı menen erisken tawlı úlkege alıp keldi.
55Aldılarınan basqa xalıqlardı quwıp shıǵardı,
Jerlerin olarǵa múlik etip, bólip berdi,
Izrail urıwların olardıń shatırlarına jaylastırdı.
56Biraq olar ele de Qudaydı sınadı,
Quday Taalaǵa qarsı bas kóterdi,
Onıń tártiplerine boysınbadı.
57Ata-babaları sıyaqlı opasızlıq qılıp, qıyanet etti,
Jaramsız sadaq yańlı isenimsiz boldı.
58Tabınatuǵın orınları menen Onı irenjitti,
Músin qudayları menen Onıń qızǵanıshın oyattı.
59Quday bulardı esitip, ǵázebi lawladı,
Izraildan pútkilley júz burdı.
60Adamlar arasındaǵı mákan jerin,
Shilodaǵı Muxaddes mákanın tárk etti.
61Óz qúdiretin tutqınlıqqa,
Óz saltanatın dushpan qolına tapsırdı ▼.
62Xalqın qılısh júzine tapsırdı,
Óz menshik xalqına ǵázeplendi.
63Jas jigitlerin ot jalmadı,
Jas qızlarına toy qosıqları aytılmadı.
64Ruwxaniyleri qılıshtan óldi,
Jesirleri joqlaw da ayta almadı.
65Biraq Iye uyqıdan oyanǵanday,
Sharaptıń tásirinen qıshqırǵan batırday qozǵaldı.
66Dushpanların shegindirip, jeńiliske ushırattı,
Olardı máńgi shermendelikke duwshar qıldı.
67Keyin Ol Yusuptiń urpaǵınan bas tarttı,
Efrayım urıwın tańlamadı.
68Biraq Yahuda urıwın,
Ózi súygen Sion tawın tańladı.
69Óz muxaddes Ibadatxanasın aspan sıyaqlı qurdı,
Onı jer júzindey etip máńgi bekkemledi.
70Óz qulı Dawıttı tańladı,
Qoy qorasınan onı shaqırıp aldı.
71Óz xalqı Yaqıptı, menshigi Izraildı baǵıw ushın,
Sawlıq qoylardıń arasınan alıp keldi ▼.
72Solay etip, ol xalqına ádalatlıq penen shopanlıq qıldı,
Sheber qolları menen olardı jetekledi.
Copyright information for
KaaIBT22L