Psalms 78
1Asaftıń jırıQuday, basqa milletler Seniń elińe bastırıp keldi,
Muxaddes Ibadatxanańdı haramladı,
Erusalimdi qarabaqanaǵa aylandırdı.
2Jem qıldı qullarıńnıń óliklerin quslarǵa,
Sadıq adamlarıńnıń denelerin jabayı haywanlarǵa.
3Qanların suwday aǵızdı Erusalim boylap,
Olardı jerleytuǵın hesh kim bolmadı.
4Bizler qońsı xalıqlarǵa masqara,
Dógeregimizdegilerge kúlki hám shermende boldıq.
5Qashanǵa deyin, Jaratqan Iye,
Máńgi dawam ete bere me ǵázebiń,
Ot sıyaqlı janǵan qáháriń?
6Ǵázebińdi shash Seni bilmeytuǵın xalıqlarǵa,
Seniń atıńdı shaqırmaytuǵın patshalıqlarǵa.
7Olar Yaqıp urpaqların jalmadı,
Onıń mákanın wayran qıldı.
8Ótmishtegi gúnalardı bizlerge júkleme,
Óz rehimińdi bizlerge tez arada kórset,
Bizler júdá hálsirep qaldıq.
9Qutqarıwshımız Quday, dańqıńa bola, bizlerge járdem ber,
Azat et, Óz atıń ushın gúnalarımızdı keshir.
10Ne ushın basqa xalıqlar:
«Olardıń Qudayı qayaqta?» – dep aytıwı kerek?
Qullarıńnıń qanınıń óshin alǵanıńdı,
Óz kózimiz benen kóreyik, bunı basqa milletler de bilsin.
11Tutqınlardıń dadı jetip barsın aldıńa,
Ólimge húkim etilgenlerdi,
Óz qúdiretli kúshiń menen qutqar.
12Seni aqıretlegen qońsı xalıqlarǵa,
Jeti ese etip, ózlerine qaytar, Iye!
13Al bizler Seniń xalqıń hám Óziń baǵıp atırǵan qoylarıńbız.
Seni máńgi táriyipleymiz,
Áwladtan-áwladqa Saǵan alǵıs-maqtaw aytamız.
Copyright information for
KaaIBT22L