‏ Psalms 79

1Atqarıwshılardıń jetekshisine. Asaftıń jırı. «Lala gúllerdiń kelisimi» namasına aytıladı
2Izraildıń shopanı, qulaq sal,
Yusupti qoy sıyaqlı alıp júriwshi!
Nurıńdı shash, kerublar arasında taxtta otırǵan.
3Efrayım, Benyamin hám Menashshe aldında,
Óz kúshińdi kórset,
Kelip, bizlerdi qutqar.

4Quday! Bizlerdi aldınǵı halımızǵa qaytar,
Bizlerge júzińniń nurın shash, qutqarılayıq!

5Jaratqan Iye, Álemniń Qudayı!
Qashanǵa deyin, xalqıńnıń duwalarına qáhárleneseń?
6Bizlerge nan ornına kóz jas berdiń,
Kóz jasqa ábden toydırdıń.
7Qońsılarımızdı bizlerge qarsı iytermelediń,
Dushpanlarımız kúler ústimizden.

8Álemniń Qudayı! Bizlerdi aldınǵı halımızǵa qaytar,
Bizlerge júzińniń nurın shash, qutqarılayıq!

9Mısırdan bir júzim aǵashın alıp kelip,
Basqa xalıqlardı quwıp, onı otırǵızdıń.
10Ol ushın jer tayarlap, tazaladıń,
Ol tamır jayıp, eldi toltırdı.
11Kóleńkesi tawlardı qapladı,
Shaqaları náhán kedr aǵashın qapladı.
12Shaqaları sozıldı Jer Orta teńizine deyin,
putaları bolsa, Evfrat dáryasına deyin.
13Ne ushın qulattıń onıń diywalların?
Joldan ótkenlerdiń hámmesi júzimin julsın dep pe?
14Toǵaydaǵı dońızlar onı qoparıp taslaydı,
Jabayı haywanlar jep qoyadı.

15Álemniń Qudayı, bizlerge júzińdi bur,
Kóklerden qarap, názer sal,
Ǵamxorlıq qıl usı júzim aǵashına.
16Oń qolıń menen otırǵızǵanıńdı,
Óziń ushın kúsheytken nálińdi qorǵa!
17Dushpanlarımız onı otqa jaǵıp, qırqıp atır,
Ǵázebiń menen olardı óltir.
18Járdem qolıń oń tárepińdegilerdiń ústinde,
Óziń ushın tárbiyalaǵan xalqıńnıń ústinde bolsın.
19Bizler Sennen hesh qashan bezbeymiz,
Bizlerdi qayta tirilt, atıńdı shaqıramız.
20Jaratqan Iye, Álemniń Qudayı!
Bizlerdi aldınǵı halımızǵa qaytar,
Bizlerge júzińniń nurın shash, qutqarılayıq!