Psalms 82
1Qosıq. Asaftıń jırı2Quday, únsiz qalma,
Sóylemey, tıp-tınısh bolma, Quday!
3Mine, dushpanlarıń shawqım shıǵarıp,
Seni jek kóretuǵınlar bas kótermekte.
4Xalqıńa qarsı hiyleli joba dúzip,
Qádirlegenlerińe qarsı oylasıq ótkermekte.
5Olar: «Keliń, olardı xalıqlar arasınan joq qılayıq,
Izraildıń atı qaytadan eske alınbasın», – deydi.
6Mınalardıń hámmesi til biriktirip,
Saǵan qarsı awqam dúzgen:
7Edomlılar hám Ismayıl urpaǵı,
Moablılar hám Ajar urpaǵı,
8Gebal, ammon hám amalek xalıqları,
Filist xalqı hám Tir turǵınları.
9Assiriya da olarǵa qosılǵan,
Olar Lut urpaǵına qosımsha kúsh bolǵan. Selah
10Midyanǵa ne islegen bolsań ▼,
Kishon sayında Sisera hám Yabinge ne qılǵan bolsań ▼,
Olarǵa da sonı isle.
11Olar En-Dorda joq qılınıp,
Jer ushın tógin bolıp qaldı.
12Olardıń aqsúyeklerine Oreb hám Zeebke islegenińdi ▼ isle,
Barlıq kósemlerine Zebax hám Salmunnaǵa qılǵanıńdı ▼ qıl.
13Olar: «Keliń, Qudaydıń jaylawlarına,
Iyelik eteyik», – degen edi.
14Qudayım! Olardı quyın kótergen shańday,
Samal ushırǵan qawıqtay etip tasla,
15Ot toǵaydı jalmaǵanday,
Jalın tawlardaǵı shóplerdi kúydirgendey,
16Boranlarıń menen olardı quwıp,
Óz dawıllarıń menen qorqınıshqa sal.
17Shermendelikten qızarsın júzleri,
Solay etip, olar Seniń atıńdı izlesin, Jaratqan Iye.
18Olar máńgi uyatqa qalıp, qorqınıshqa tússin,
Xorlanıp, joq bolsın.
19Bilsin olar Seniń atıń Jaratqan Iye ekenin,
Jer júziniń jalǵız Quday Taalası ekenińdi.
Copyright information for
KaaIBT22L