Psalms 83
1Atqarıwshılardıń jetekshisine. Gat tarlı ásbabında. Qorax áwladınıń jırı2Qanday ájayıp Seniń mákanıń,
Álemniń Jaratqan Iyesi!
3Janım Seniń háwlilerińdi ańsap, sharshadı,
Júregim hám pútkil barlıǵım,
Tiri Qudayǵa shadlanıp baqıradı.
4Álemniń Jaratqan Iyesi, Patsham, Qudayım!
Qurbanlıq ornıńnıń qasında,
Qus ta jasaw ushın ózine orın tabar,
Palapanları ushın qarlıǵash uya qurar.
5Qanday baxıtlı Seniń Úyińde jasaytuǵınlar,
Olar tınbastan Saǵan alǵıs-maqtaw aytar! Selah
6Qanday baxıtlı Sennen kúsh tapqan adam,
Shın júrekten Sionǵa barıwǵa umtılǵanlar.
7Jılaw oypatlıǵınan ótip,
Olar suw ózeklerin ashar,
Birinshi jawın ol jerdi bereketke toltırar.
8Jol júrip, olardıń kúshine kúsh qosılar,
Sionda Qudaydıń aldında bolar.
9Jaratqan Iye, Álemniń Qudayı, duwamdı tıńla,
Qulaq sal, Yaqıptıń Qudayı! Selah
10Quday, bizlerdiń qalqanımızǵa qara,
Óziń maylaǵan patshańa názer sal!
11Seniń háwlilerińdegi bir kún mıń kúnnen artıq.
Nahaqlardıń shatırında jasawdan góre,
Qudaydıń Úyiniń bosaǵasında turǵanım abzal.
12Quday Iye – quyash hám qalqandur,
Ol miyrim hám dańq berer,
Minsiz júrgenlerden jaqsılıqtı ayamas.
13Álemniń Jaratqan Iyesi,
Qanday baxıtlı Saǵan úmit baylaǵan adam!
Copyright information for
KaaIBT22L