Psalms 84
1Atqarıwshılardıń jetekshisine. Qorax áwladınıń jırı2Jaratqan Iye, Óz elińe miyrim kórsettiń,
Yaqıp urpaǵın abadanshılıqqa jáne eristirdiń.
3Xalqıńnıń ayıbın keshirdiń,
Olardıń barlıq gúnalarınan óttiń. Selah
4Pútkil qáhárińdi uslap qaldıń,
Lawlaǵan ǵázebińnen qayttıń.
5Bizlerdi qutqarǵan Quday, aldınǵı awhalımızǵa qaytar,
Bizlerge degen ǵázebińdi toqtat.
6Máńgi ǵázepleneseń be bizlerge?
Ǵázebińdi áwladtan-áwladqa dawamlaysań ba?
7Xalqıń Sende quwanısh tabıwı ushın,
Bizlerdi qaytadan janlandırmaysań ba?
8Jaratqan Iye, súyispenshiligińdi kórset,
Bizlerge qutqarıwıńdı inam et.
9Qudaydıń, Jaratqan Iyeniń sózine qulaq túremen,
Ol Óz xalqına, Óziniń sadıq adamlarına tınıshlıq sózin aytadı,
Endi olar aqılsız jollarına qaytpasın.
10Onıń saltanatı elimizde mákanlawı ushın,
Sózsiz, Onnan qorqqanlarǵa Onıń qutqarıwı jaqın.
11Súyispenshilik hám sadıqlıq ushırasadı,
Ádillik penen tınıshlıq súyisedi.
12Sadıqlıq jerden kógerip shıǵadı,
Ádalatlıq aspannan qaraydı.
13Jaratqan Iye iygilikti jawdıradı,
Jerimiz óz ónimin beredi.
14Ádalatlıq Onıń aldında júredi,
Onıń qádemleri ushın jol tayarlaydı.
Copyright information for
KaaIBT22L