Psalms 85
1Dawıttıń duwasıJaratqan Iye, qulaq salıp, juwap ber maǵan,
Men ǵárip hám mútájben.
2Janımdı qorǵa, Saǵan sadıqpan,
Qudayım, Saǵan úmit baylaǵan qulıńdı qutqar!
3Maǵan miyrim-shápáátińdi túsir, Iye,
Saǵan kúni boyı jalbarınaman.
4Qulıńnıń qálbin quwanıshqa toltır,
Júregimdi ashaman Saǵan, Iye.
5Sen iygilikli hám keshirimliseń, Iye,
Seni shaqırǵanlardıń hámmesine súyispenshiligiń ullı.
6Qulaq sal meniń duwama, Jaratqan Iye,
Jalbarınǵan dawısıma dıqqat et!
7Qıyın kúnlerimde Seni shaqıraman,
Sen meni esiteseń.
8Qudaylar arasında Saǵan teńlesetuǵını joq, Iye,
Seniń islerińdey isler joq.
9Sen jaratqan barlıq milletler,
Iye, Seniń aldıńa kelip, tájim qıladı,
Seniń atıńdı dańqqa bóleydi.
10Sen ullısań, ájayıp isler isleyseń,
Sen jalǵız Qudaysań.
11Jaratqan Iye, jolıńdı maǵan úyret,
Saǵan sadıq bolıp júreyin,
Seniń atıńnan qorqatuǵın etip, júregimdi bekkemle.
12Quday Iyem, shın júregim menen alǵıslayman,
Seniń atıńdı máńgi dańqqa bóleymen.
13Maǵan degen súyispenshiligiń ullı,
Janımdı óliler mákanınıń tuńǵıyıǵınan aman saqlaysań.
14Quday, arsızlar maǵan qarsı kóterildi,
Qaraqshılar toparı janımdı alıw ushın meni izlep júr,
Olar Seni pisent etpeydi.
15Sen, Iye, rehimli hám miyrimli Qudaysań,
Sabır-taqatlı, súyispenshiligiń ullı hám sadıqsań.
16Awhalıma qara, rehim qıl maǵan,
Qulıńa kúsh-quwat ber,
Shorıńnıń ulın qutqar.
17Qayırqomlıǵıńnan bir belgi kórset maǵan,
Meni jek kóretuǵınlar kórip, uyalıp qalsın.
Jaratqan Iye, járdem kórsetip,
Maǵan jubanısh bergen Ózińseń.
Copyright information for
KaaIBT22L