‏ Psalms 87

1Qosıq. Qorax áwladınıń jırı. Atqarıwshılardıń jetekshisi ushın. Muńlı aytılatuǵın Ezrax násilinen bolǵan Hemannıń násiyat jırı
2Jaratqan Iye, meni qutqarıwshı Quday,
Kúni-túni aldıńa kelip, jalbarınaman.
3Duwam Seniń aldıńa jetip barsın,
Qulaq sal jalbarınıwıma.

4Janım azapqa tolı,
Ómirim óliler mákanına jaqınlastı.
5Qábirge kirgenler arasında dep esaplanaman,
Hal-dármanı qalmaǵan adamǵa uqsayman.
6Men óliler arasına taslanǵanman,
Sen endi eske almaytuǵın,
Járdem qolıńnan mahrum bolǵan,
Qazalanıp qábirde jatırǵanlarǵa uqsayman.
7Sen meni qábirdiń túbine,
Qarańǵılıq hám tuńǵıyıqqa tasladıń.
8Ǵázebiń ústimdi zildey basıp,
Barlıq tolqınlarıń menen ezdiń meni. Selah

9Joldaslarımnan ayırdıń,
Meni olarǵa jerkenishli qıldıń,
Qamalıp qaldım, shıǵa almayman.
10Kózlerim qayǵıdan hálsiregen,
Hár kúni Seni shaqırdım, Jaratqan Iye,
Qollarımdı Saǵan jaydım.

11Káramatlarıńdı kórseter me ediń óliler ushın?
Ruwxları turıp, Seni táriyipler me edi? Selah
12Seniń súyispenshiligiń qábirde,
Sadıqlıǵıń nabıt bolıw mákanında aytıla ma?
13Qarańǵılıqta Seniń ájayıp isleriń haqqında,
Umıtılıw mákanında ádalatlıǵıń haqqında aytıla ma?

14Al men, Jaratqan Iye, Seni járdemge shaqıraman,
Qılǵan duwam tańda jetip barar Saǵan.
15Ne ushın mennen júz burdıń, Jaratqan Iye,
Nege júzińdi mennen jasırasań?
16Jaslıǵımnan qıynalaman, ólimim jaqın qalǵan,
Qorqınıshıń aldında sharasız qaldım.
17Qáhárli ǵázebiń ústimnen basıp tasladı,
Qorqınıshlarıń meni tamam qıldı.
18Kúni boyı bular suw sıyaqlı orap aldı,
Dógeregimdi pútkilley qorshap aldı.
19Doslarımnan hám jaqınımnan ayırdıń,
Tek ǵana qarańǵılıq joldasım bolıp qaldı.