‏ Psalms 88

1Ezrax násilinen bolǵan Etannıń násiyat jırı
2Jaratqan Iyeniń súyispenshiligin máńgi jırlayman,
Sadıqlıǵın áwladtan-áwladqa járiyalayman.
3Súyispenshiligiń máńgi ornalasqan,
Sadıqlıǵıńdı kóklerde bekkemlediń, deymen.
4Sen bılay dediń: «Tańlaǵanım menen kelisim dúzdim,
Qulım Dawıtqa bılay dep ant ishtim:
5„Urpaǵıńdı máńgi bekkem qılaman,
Taxtıńdı áwladtan-áwladqa dawam ettiremen“». ▼

▼ 2Pat 7:16.

Selah

6Jaratqan Iye, kókler alǵıslar ájayıp islerińdi,
Maqtalar sadıqlıǵıń perishteler jıyınında.
7Kóklerde Jaratqan Iyege kim teńlese aladı?
Iláhiy barlıqlar ishinde Jaratqan Iyege uqsaytuǵını bar ma?
8Perishteler keńesinde Quday oǵada qorqınıshlı,
Átirapındaǵılardıń hámmesinen aybatlı.
9Álemniń Qudayı Jaratqan Iye,
Sen sıyaqlı kúshli bar ma, Jaratqan Iye?
Sadıqlıǵıń átirapıńdı orap alǵan.

10Qutırǵan teńizler ústinen Sen húkimdarlıq qılasań,
Kóterilgen tolqınlardı Sen tınıshlandırasań.
11Sen Rahabtı ▼

▼ Rahab – teńiz aydarhası.

óliktey etip ezip tasladıń,
Qúdiretli qolıń menen dushpanlardı tarqatıp jiberdiń.
12Kókler Seniki, jer júzi de Seniki,
Dúnyanı hám onı toltırıp turǵanlardı Sen ornattıń.
13Arqa hám qublanı Óziń jarattıń,
Tabor hám Xermon tawları atıń sebepli shadlanıp baqıradı.
14Bilegiń kúshli, qolıń qúdiretli,
Oń qolıń hámmesinen bálentte.

15Ádillik hám ádalatlıq taxtıńnıń tiykarı,
Súyispenshilik hám sadıqlıq aldıńda turadı.
16Qanday baxıtlı bálent dawısta shadlanǵan xalıq, Jaratqan Iye!
Olar Seniń júzińniń nurında júredi.
17Kúni boyı Seniń atıń sebepli shadlanadı,
Ádilligiń arqalı joqarı kóteriledi.
18Sen dańqqa bóleytuǵın kúshimizseń,
Írazılıǵıń arqalı kúshimiz artadı.
19Qalqanımız Jaratqan Iyeniki,
Patshamız Izraildıń Muxaddesine tiyisli.

20Burın ayan arqalı sóylep,
Óz sadıq adamlarıńa bılay dediń:
«Bir jawıngerdi qollap quwatladım,
Xalıq ishinen bir jigitti joqarı kóterdim.
21Qulım Dawıttı taptım,
Muxaddes mayım menen onı mayladım.
22Qolım onı qollap quwatlaydı,
Bilegim oǵan kúsh beredi.
23Dushpan onı alday almaydı,
Jawızlar oǵan zulımlıq qıla almaydı.
24Jawların onıń kóz aldında ezemen,
Onı jek kórgenlerdi qıraman.
25Sadıqlıǵım hám súyispenshiligim onıń menen birge,
Meniń atım menen ol jeńiske erisedi.
26Onıń qolın teńizdiń ústine,
Oń qolın dáryalardıń ústine qoyaman.
27Ol Meni shaqırıp, bılay deydi:
„Sen meniń ákemseń, Qudayımsań,
Qutqarıwshı jartasımsań“.
28Men de onı tuńǵısh ul qılıp alaman,
Dúnyadaǵı patshalardıń eń ullısı qılaman.
29Oǵan bolǵan súyispenshiligimdi máńgi saqlayman,
Onıń menen dúzgen kelisimim bekkem turadı.
30Áwladın máńgige,
Taxtın kókler turǵansha dawam ettiremen.

31Eger onıń násili kórsetpelerimnen júz burıp,
Nızamlarım boyınsha júrmese,
32Qaǵıydalarımdı buzıp,
Buyrıqlarımdı orınlamasa,
33Jınayatları ushın tayaq penen uraman,
Gúnaları ushın olardı jazalayman.
34Biraq Dawıtqa bolǵan súyispenshilikten waz keshpeymen,
Sadıqlıǵıma nemquraydı qaramayman.
35Kelisimimdi buzbayman,
Awzımnan shıqqan sózimnen hasla qaytpayman.
36Bir márte muxaddesligim haqı ant ishtim,
Dawıttı aldamayman.
37Onıń áwladı máńgi dawam etedi,
Onıń taxtı Meniń aldımda quyash yańlı turadı.
38Ay sıyaqlı máńgi-baqıy aman turadı,
Kóklerde sadıq gúwa boladı». Selah

39Biraq Sen onnan jerkenip, júz burdıń,
Maylaǵan patshańa qattı ǵázeplendiń.
40Qulıń menen dúzgen kelisimnen bas tarttıń,
Onıń tajın topıraqqa bılǵadıń.
41Onıń barlıq diywalların qulattıń,
Wayran qıldıń qorǵanların.
42Joldan ótkenlerdiń hámmesi onı tonadı,
Qońsı xalıqlarǵa masqara boldı.
43Jawlarınıń oń qolın onnan joqarı qıldıń,
Barlıq dushpanların quwanıshqa bólediń.
44Ótkir qılıshın artqa qaytardıń,
Sawashta onı qollap quwatlamadıń.
45Onıń saltanatına shek qoydıń,
Taxtın jerge qulattıń.
46Onıń jaslıq kúnlerin qısqarttıń,
Onı shermende qıldıń. Selah

47Qashanǵa deyin bul dawam etedi, Jaratqan Iye?!
Ózińdi bizlerden máńgi jasırasań ba?
Qashanǵa deyin, ǵázebiń ottay lawlap janadı?
48Esińe túsir ómirimniń qanshelli qısqa ekenin,
Ne ushın adamzattı biyhuda jarattıń?!
49Bul dúnyada ómir súrip, ólim kórmeytuǵın,
Óliler mákanınıń kúshinen janın qutqaratuǵın adam bar ma? Selah

50Qayaqta seniń burınǵı súyispenshiligiń, Iye?
Dawıtqa sadıqlıq penen ant ishken ediń!
51Esle, Iye, qulıńnıń shermende bolǵanın,
Barlıq xalıqlardıń xorlıqlı sózlerin kóterip júrippen.
52Esle, dushpanlarıńnıń masqaralawın,
Maylaǵan patshańnıń hár bir qádemin masqara qılıwın.

53Jaratqan Iyege máńgi alǵıslar bolsın!
Awmiyin! Awmiyin!