‏ Psalms 9

1Atqarıwshılardıń jetekshisine. «Uldıń ólimi» namasına aytıladı. Dawıttıń jırı
2Jaratqan Iye, shın júrekten Seni táriyipleymen,
Barlıq ájayıp islerińdi járiyalayman.
3Sende quwanıp, yoshlanaman,
Atıńa arnap, saz shertip alǵıslayman, Quday Taala!

4Dushpanlarım sheginip qashqanda,
Súrnigip óler Seniń aldıńda.
5Meni húkim qılıp, dawımdı qarap shıqtıń,
Taxtıńa otırıp, ádil húkim shıǵardıń.

6Qáhárlenip, xalıqlardı ayıpladıń,
Napáklerdi joq qıldıń,
Máńgi-baqıy óshirdiń olardıń atların.
7Wayran ishinde qalıp, máńgi joq boldı dushpanımız,
Sen olardıń qalaların qulattıń,
Olar endi qaytadan eske alınbas.

8Jaratqan Iye máńgi patshalıq qıladı,
Húkim qılıw ushın Óz taxtın qurdı.
9Ol dúnyanı basqarar ádalatlıq penen,
Húkim qılar xalıqlardı ádillik penen.
10Ezilgenler ushın Jaratqan Iye biyik qorǵandur,
Qıyın jaǵdaylarda olarǵa qorǵan bolar.

11Seni tanıytuǵınlar, Saǵan úmit baylar, Jaratqan Iye,
Ózińdi izlegenlerdi hesh qashan taslap ketpediń.

12Saz shertip, Sionda otırǵan Jaratqan Iyeni alǵıslań!
Islegen islerin xalıqlar arasında járiyalań!
13Tógilgen qannıń qunın talap qıladı,
Ol bulardı este saqlaydı,
Ezilgenlerdiń páriyadın umıtpaydı.

14Rehim qıl maǵan, Jaratqan Iye!
Meni jek kórgen jawlarım azap bermekte!
Ólim awzınan Sen meni qaytarasań.
15Sonıń ushın, qız Sionnıń dárwazalarınıń maydanında,
Saǵan alǵıs-maqtaw aytaman,
Shadlanaman, meni qutqarǵan Senseń.

16Xalıqlar ózleri qazǵan shuqırǵa ózleri tústi,
Qurǵan torlarına óz ayaqları ilindi.
17Ádil húkimi menen Jaratqan Iye Óziniń kimligin kórsetti,
Zalımlar ózleri qurǵan duzaqqa tústi. Higgayon, ▼

▼ Higgayon – bul saz termini bolıwı múmkin. Mánisi belgisiz.

Selah

18Jawızlar hám Qudaydı umıtqan barlıq xalıqlar,
Óliler mákanına túser.
19Al mútáj adamlar hámme waqıtta umıtılıp qalmas,
Ǵáriplerdiń úmiti máńgi joqqa shıǵarılmas.

20Tur, Jaratqan Iye! Adamzat jeńip shıqpasın,
Dárgayıńda xalıqlar húkim qılınsın.
21Olarǵa qorqınısh ber, Jaratqan Iye!
Xalıqlar ózleriniń adamzat ekenin bilsin. Selah

22Jaratqan Iye, ne ushın uzaqta turıpsań,
Qıyın jaǵdaylarda Ózińdi jasırasań?

23Jawızlar menmenlik penen ǵáriplerdi awlaydı,
Óz basına jetsin toqıǵan hiyleleri.
24Jawız adam jawız háwesleri menen maqtanar,
Haram tabısqa qumar adam Jaratqan Iyege nálet aytıp, Onı mensinbes.
25Qudayǵa qaray umtılmaydı tákabbir zalımlar,
Hámme waqıtta «Quday joq», – dep oylaydı olar.
26Zalımlar hámme waqıtta tabısqa eriser,
Qudaydıń buyrıqlarına aqılı jetpes,
Olar dushpanların pisent etpes.
27Olar óz kewlinde bılay dep oylaydı:
«Bizler hesh qashan súrnikpeymiz,
Áwladtan-áwladqa apatqa dus kelmeymiz».
28Jawızlardıń awzı náletke, hiylege, zulımǵa tolı,
Tiliniń astında tur jawızlıq hám jaman sózler.
29Olar awıllarda jasırınıp aladı,
Ańlıp, ayıpsız adamdı óltiredi.
Kózleri sharasız qalǵan qurbandı izleydi.
30Buqqıda jatqan arıslan sıyaqlı,
Biysharanı uslayman, dep tasada jatadı.
Óz torına ilindirip, ǵáripti uslap aladı.
31Biyshara jeńilip, qulaydı,
Jawızdıń oljasına aylanadı.
32Olar óz kewlinde: «Quday qılmıslarımızǵa itibar bermeydi,
Júzin jawıp alǵan, hesh qashan kórmeydi», – dep oylaydı.

33Tur, Jaratqan Iye, qolıńdı soz, Quday!
Ezilgenlerdi umıtpa!
34Ne ushın jawızlar Seni mensinbeydi?
Ne ushın olar óz kewlinde:
«Quday mennen esap soramaydı», – deydi?
35Al Sen ezilgenlerdi hám azap shekkenlerdi kóreseń,
Járdem beriw ushın olarǵa názer salasań,
Sharasız qalǵanlar ózlerin Saǵan tapsıradı,
Jetimlerdiń járdemshisi Ózińseń.
36Napák hám jawızdıń qolların sındırıp tasla,
Qılmısları ushın olardan esap sora,
Basqa jawızlıq qılmasın olar.

37Jaratqan Iye máńgi-baqıy patshadur,
Joq boladı Onıń elinen basqa xalıqlar.

38Jaratqan Iye, ezilgenlerdiń tilegin esiteseń,
Jigerlendirerseń olardı,
Jetim hám ezilgenlerdiń dadına qulaq salıp,
39Hesh adam bendesi olardı qorqınıshqa salmasın, dep,
Ádillik qılasań olarǵa.