Psa 90 | KaaIBT22L | STEP | Quday Taalanıń panasında jasaǵan adam, Qúdireti kúshli Qudaydıń sayasında túneydi.

‏ Psalms 90

1 Quday Taalanıń panasında jasaǵan adam,
Qúdireti kúshli Qudaydıń sayasında túneydi.
2 Jaratqan Iyege bılay deymen:
«Sen meniń panamsań, bekinisimseń,
Men úmit baylaǵan Qudayımsań».

3 Sózsiz Ol seni ańshınıń duzaǵınan,
Óltiretuǵın illetten qutqaradı.
4 Ol seni oraydı Óz párleri menen,
Onıń qanatlarınıń astınan pana tabasań,
Onıń sadıqlıǵı qalqanıń hám qorǵan diywalıń boladı.
5 Sonda sen túnde qáwip-qáterden,
Kúndiz ushqan oqlardan,
6 Qarańǵılıqta keletuǵın illetten,
Túski waqıtta qırǵın keltiretuǵın apattan qorqpaysań.

7 Qaptalıńda mıń adam,
Oń tárepińde on mıń adam qırılsa da,
Bul apatlar saǵan jaqınlamaydı.
8 Tek ǵana sen óz kóziń menen,
Jawız adamlardıń jazalanıwın kóreseń.

9 Eger Jaratqan Iyeni óz panań,
Quday Taalanı mákanlaytuǵın jeriń qılsań,
10 Bálege duwshar bolmaysań,
Shatırıńa apat jaqınlamaydı.
11 Ol perishtelerine buyrıq beredi,
Perishteler barlıq jollarıńdı qorǵaydı.
12 Ayaǵıńdı tasqa urıp almawıń ushın,
Olar seni qollarında alıp júredi.
13 Arıslan hám jılannıń ústinen basıp óteseń,
Kúshli arıslan hám jılandı basqılap taslaysań.

14 Jaratqan Iye bılay deydi:
«Meni súygeni ushın, onı qutqaraman,
Meniń atımdı bilgeni ushın, onı aman saqlayman.
15 Meni shaqırǵanda, oǵan juwap beremen,
Basına is túskende, onıń qasında bolaman,
Onı qutqarıp, izzet kórsetemen.
16 Oǵan uzaq ómir baǵıshlayman,
Óz qutqarıwımdı oǵan kórsetemen».