Psalms 95
(1Jln 16:23-33)
1Jaratqan Iyege taza qosıq aytıń!Háy, pútkil dúnya, Jaratqan Iyege arnap qosıq aytıń!
2Jaratqan Iyege arnap qosıq aytıń,
Onıń atın alǵıslań,
Hár kúni járiyalań Onıń qutqarıwın!
3Bayan etiń dańqın milletlerge,
Ájayıp islerin barlıq xalıqlarǵa!
4Awa, Jaratqan Iye ullı, maqtawǵa júdá ılayıqlı,
Barlıq qudaylardan aybatlı.
5Xalıqlardıń barlıq qudayları jalǵan,
Al Jaratqan Iye kóklerdi jaratqan.
6Saltanat hám ullılıq Onıń dárgayında,
Qúdiret hám gózzallıq muxaddes Ibadatxanasında.
7Háy, pútkil xalıqlar, Jaratqan Iyeni maqtań,
Jaratqan Iyeniń saltanatın hám qúdiretin maqtań,
8Jaratqan Iyeniń saltanatın atına ılayıqlı túrde maqtań,
Sıylar ákelip, Onıń háwlisine kiriń!
9Muxaddes sán-sawlatqa bólengen Jaratqan Iyege sıyınıń!
Titireń pútkil jer júzi Onıń aldında!
10Milletler arasında: «Jaratqan Iye patshalıq qılmaqta,
Dúnya bekkem ornatılǵan, terbelmeydi,
Ol xalıqlardı ádalatlıq penen húkim qıladı», – dep aytıń.
11Quwansın kókler, yoshlansın jer júzi!
Shuwlasın teńiz hám onı toltırıp turǵanlar!
12Yoshlansın dala hám onıń ústindegiler!
Sonda toǵaydaǵı aǵashlar shadlanıp baqırısar,
13Kiyatırǵan Jaratqan Iyeniń aldında.
Óytkeni Ol jer júzin húkim etiw ushın kiyatır,
Dúnyanı ádalatlıq penen,
Xalıqlardı Óz ádilligi menen húkim etedi.
Copyright information for
KaaIBT22L