Rev 11 | KaaIBT22L | STEP | Sonnan keyin, maǵan ólsheytuǵın tayaq sıyaqlı qamıs berilip, bılay delindi: – Bar da, Qudaydıń Ibadatxanasın hám qurbanlıq orındı ólshep, sol jerde sıyınıp atırǵanlardı sanap shıq.

‏ Revelation of John 11

Eki gúwa

1 Sonnan keyin, maǵan ólsheytuǵın tayaq sıyaqlı qamıs berilip, bılay delindi:

– Bar da, Qudaydıń Ibadatxanasın hám qurbanlıq orındı ólshep, sol jerde sıyınıp atırǵanlardı sanap shıq. 2 Al Ibadatxananıń sırtqı háwlisin ólshemey qaldır. Sebebi ol jer butqa tabınıwshılarǵa berildi. Olar muxaddes qalanı qırıq eki ay dawamında ayaq astı qıladı. 3 Biraq Men Ózimniń eki gúwama kúsh beremen. Olar aza kiyimin kiyip, bir mıń eki júz alpıs kún payǵambarshılıq qıladı.

4 Bul eki gúwa – pútkil dúnyanıń Iyesi Quday aldında turǵan eki záytún aǵashı hám eki shıra qoyǵısh. 5 Eger kim de kim olarǵa zıyan tiygizbekshi bolsa, olardıń awızlarınan ot shıǵıp, dushpanların kúydirip joq qıladı. Olarǵa zıyan tiygizbekshi bolǵanlar usılay óltiriledi. 6 Bul eki gúwa ózleri payǵambarshılıq aytqan kúnlerde jawın jawmasın dep, aspandı jawıp taslaw biyligine iye. Jáne olardıń suwlardı qanǵa aylandırıwǵa, qansha qálese, jer júzin sonsha hár túrli bálelerge duwshar etiwge de biyligi bar.

7 Olar gúwalıqların aytıp tawısqanda, tereń tuńǵıyıqtan shıqqan jırtqısh haywan olar menen urısadı hám olardı jeńip óltiredi. 8 Olardıń óligi tımsalıy túrde Sodom hám Mısır dep atalatuǵın ullı qalanıń kóshesinde qaldırıladı. Olardıń Iyesi de sol jerde atanaq aǵashqa shegelengen edi. 9 Úsh yarım kún barlıq xalıqlardıń, urıwlardıń, tiller hám milletlerdiń adamları olardıń óligin tamashalap, denelerin qábirge qoyıwǵa ruxsat etpeydi. 10 Jer júzinde jasawshılar buǵan quwanıp, bayram qıladı hám bir-birine sawǵalar jiberedi. Óytkeni bul eki payǵambar jer júzinde jasawshılarǵa azap bergen edi.

11 Biraq úsh yarım kúnnen soń, Qudaydan kelgen ómir demi olardıń denelerine enip, ekewi de ayaqqa turdı. Bunı kórgenlerdi kúshli qorqınısh biyledi. 12 Sonda eki payǵambar aspannan esitilgen bálent bir dawıstıń ózlerine: «Bul jerge kóterilińler», – degenin esitti. Olar dushpanlarınıń kóz aldında bir bult ústinde aspanǵa kóterilip ketti. 13 Sol waqıtta-aq kúshli jer silkiniw bolıp, qalanıń onnan biri qıyralıp qaldı hám jeti mıń adam nabıt boldı. Al qalǵan adamlardı kúshli qorqınısh biylep, aspandaǵı Qudaydı alǵısladı.

14 Ekinshi hásiret ótti. Mine, úshinshi hásiret jaqınlap kelmekte.

Jetinshi kárnay

15 Jetinshi perishte kárnayın shertti. Aspannan bálent dawıslar esitilip: «Dúnya júzi patshalıǵı Iyemizdiki hám Onıń Masiyxıniki boldı.
Ol máńgi-baqıy patshalıq etedi», – dedi.

16 Qudaydıń aldında óz taxtlarında otırǵan jigirma tórt aqsaqal jerge bas urıp, Qudayǵa tabındı hám bılay dedi: 17 «Qúdireti kúshli Quday, Jaratqan Iye!
Sen bar bolǵansań, házir de barsań ^{▼▼ Bazı qoljazbalarda «keleshekte de bar bolasań» degen sózler de bar.}!
Saǵan shúkirlik etemiz.
Sebebi Sen ullı qúdiretiń menen patshalıq ete basladıń.
18 Milletler qattı ashıwlanǵan edi,
Endi Sen de ǵázepke mindiń.
Ólilerdi húkim etetuǵın waqtıń keldi,
Xızmetshileriń bolǵan payǵambarlarǵa,
Muxaddeslerge, yaǵnıy Seniń atıńdı húrmet etetuǵın úlken-kishige sıylıq beriw,
Al jer júzin nabıt qılıwshılardı nabıt qılıw waqtıń keldi».

19 Sonda Qudaydıń aspandaǵı Ibadatxanası ashıldı hám Ibadatxanadaǵı Onıń Kelisim sandıǵı ^{▼▼ Kelisim sandıǵı – sózlikke qarań.} kórindi. Sol waqıtta shaqmaq shaqtı, dawıslar shıqtı, gúldirmama gúrkiredi hám jer silkinip, kúshli burshaq jawdı.