Rev 12 | KaaIBT22L | STEP | Aspanda bir ullı káramatlı belgi payda boldı: quyashqa oranǵan, ayaqlarınıń astında ay, basında on eki juldızlı tajı bar bir hayal kórindi.

‏ Revelation of John 12

Hayal hám aydarha

1 Aspanda bir ullı káramatlı belgi payda boldı: quyashqa oranǵan, ayaqlarınıń astında ay, basında on eki juldızlı tajı bar bir hayal kórindi. 2 Hayal hámiledar edi, ol bosanbaqshı bolıp, tolǵaq tutıp baqırmaqta edi. 3 Sońınan aspanda basqa bir káramatlı belgi payda boldı: jeti baslı, on shaqlı, baslarında jeti tajı bar, úlken qızıl aydarha kórindi. 4 Aydarha quyrıǵı menen aspandaǵı juldızlardıń úshten birin sıpırıp, jerge ılaqtırdı. Sońınan ol tuwılıwdan-aq balanı jutıp jiberiw ushın, tuwayın dep atırǵan hayaldıń aldında turıp aldı. 5 Hayal ul tuwdı. Barlıq milletlerdi temir tayaq penen basqaratuǵın ^{▼▼ Zab 2:9} bul bala dárhal Qudaydıń aldına, Qudaydıń taxtına alıp kelindi. 6 Al hayal shólge qashıp ketti. Ol jerde hayaldıń bir mıń eki júz alpıs kún baǵılıwı ushın, Quday tárepinen tayarlanǵan bir orın bar edi.

7 Aspanda sawash baslandı. Bas perishte Mixail hám onıń perishteleri aydarhaǵa qarsı urıstı. Aydarha da óz perishteleri menen olarǵa qarsı urıssa da, 8 kúshi jetpey jeńilip qalıp, aspandaǵı orınlarınan ayırıldı. 9 Ázázúl yamasa shaytan dep atalǵan úlken aydarha, pútkil dúnyanı joldan azǵırǵan eski jılan óz perishteleri menen birlikte jerge ılaqtırıldı.

10 Sonda men aspanda bálent bir dawıstıń bılay degenin esittim: «Mine, Qudayımızdıń qutqarıwı, qúdireti hám patshalıǵı keldi,
Onıń Masiyxınıń húkimdarlıǵı ornadı.
Óytkeni tuwısqanlarımızdıń ayıplawshısı,
Olardı Qudayımızdıń aldında kúni-túni,
Ayıplaǵan shaytan jerge ılaqtırıldı.
11 Tuwısqanlarımız Qozınıń qanı menen,
Jáne ózleri aytqan gúwalıqları menen onı jeńdi.
Bul ushın olar óz janların ólimge qıydı.
12 Sonlıqtan aspan hám onda jasawshılar, shadlanıńlar!
Al jer hám teńiz, sizler hásiret shegesizler!
Sebebi shaytan ústińizge tústi.
Ol óz waqtınıń az qalǵanın bilip, ǵázepke tolǵan».

13 Aydarha óziniń jerge ılaqtırılǵanın kórgende, ul bala tuwǵan hayaldıń izinen quwa ketti. 14 Jılannan qashıp, shóldegi ózi ushın arnalǵan jerge ushıp ketiwi ushın, hayalǵa úlken bir búrkittiń eki qanatı berildi. Hayal ol jerde bir múddet, eki múddet hám yarım múddet dawamında baǵılıwı lazım edi. 15 Sonda jılan hayaldı sel menen ıǵızıp jiberiw ushın, awzınan onıń izinen dáryaday suw aǵızdı. 16 Biraq jer awzın ashtı da, aydarhanıń awzınan aǵızǵan suwın jutıp jiberip, hayalǵa járdem etti. 17 Sonda aydarha hayalǵa qarsı qáhárlendi. Ol hayal násilinen bolǵan basqalar menen, yaǵnıy Qudaydıń buyrıqların orınlap, Iysanıń gúwalıǵına sadıq qalǵanlar menen urısıwǵa atlandı.