Rev 14 | KaaIBT22L | STEP | Sońınan Qozınıń Sion tawınıń ústinde turǵanın kórdim. Qozınıń janında mańlayına Qozınıń hám Onıń Ákesiniń atı jazılǵan bir júz qırıq tórt mıń adam bar edi.

‏ Revelation of John 14

Qozı hám qutqarılǵanlar

1 Sońınan Qozınıń Sion tawınıń ^{▼▼ Sion tawı – Erusalim qalasındaǵı bir taw. Sózlikke qarań.} ústinde turǵanın kórdim. Qozınıń janında mańlayına Qozınıń hám Onıń Ákesiniń atı jazılǵan bir júz qırıq tórt mıń adam bar edi. 2 Aspannan sarqırap aqqan suwdıń sestindey, kúshli gúldirmama dawısınday bir ses esittim. Men esitken bul ses arfa shertiwshilerdiń shertken namasına uqsaytuǵın edi. 3 Usı bir júz qırıq tórt mıń adam taxttıń, tórt maqluqtıń hám aqsaqallardıń aldında jańa bir qosıq aytıp turǵan edi. Gúnalarınıń qunı ótelip, jer júzinen satıp alınǵan usı adamlardan basqa hesh kim bul qosıqtı úyrene almas edi. 4 Bular ózlerin buzıqshılıqtan taza saqlaǵan, pák qızlarday adamlar edi. Qozı qayaqqa barsa, olar Onıń izine erdi. Olar Qudaydıń hám Qozınıń tuńǵıshları bolıp, adamlar arasınan satıp alınǵanlar. 5 Awızlarınan jalǵan sóz shıqpaǵan olar – minsiz adamlar ^{▼▼ minsiz adamlar – Bazı qoljazbalarda «Qudaydıń taxtınıń aldında minsiz adamlar».}.

Úsh perishteniń xabarı

6 Bunnan soń, men aspannıń ortasında ushıp júrgen basqa bir perishteni kórdim. Bul perishte jer júzinde jasawshılarǵa: hár bir millet hám urıwǵa, hár bir til hám xalıqqa járiyalanatuǵın máńgi Xosh Xabarǵa iye edi. 7 Ol bálent dawıs penen: «Qudaydan qorqıńlar! Onı alǵıslańlar! Onıń húkim etetuǵın waqtı keldi. Aspandı, jerdi, teńizdi hám suw bulaqların Jaratqanǵa sıyınıńlar!» – dedi.

8 Onıń izinen kiyatırǵan ekinshi perishte bılay dedi: «Quladı! Óz buzıqshılıǵınıń kúshli sharabın barlıq milletlerge ishkizip, olardı azǵırǵan ullı Babilon ^{▼▼ Babilon – Rim názerde tutılǵan.} quladı!»

9 Ekewiniń izinen kiyatırǵan úshinshi perishte bálent dawıs penen bılay dedi: «Kim de kim birinshi jırtqısh haywanǵa hám onıń músinine tabınıp, mańlayına yamasa qolına onıń tamǵasın qabıl etse, 10 ol Qudaydıń qáhárli ǵázep kesesinde ^{▼▼ Qudaydıń qáhárli ǵázep kesesi – Qudaydıń jazası.} tayarlanǵan Qudaydıń ǵázebiniń kúshli sharabınan ishedi. Muxaddes perishtelerdiń hám Qozınıń aldında ot hám janıp turǵan kúkirtten azap shegedi. 11 Olarǵa azap beretuǵın ottıń tútini máńgi-baqıy burqırap turadı. Birinshi jırtqısh haywanǵa hám onıń músinine tabınıp, atınıń tamǵasın qabıl etkenler kúni-túni tınıshlıq kórmeydi. 12 Sol waqıtta Qudaydıń buyrıqların orınlap, Iysaǵa degen isenimine sadıq qalǵan muxaddeslerdiń sabırlılıǵı kerek boladı».

13 Sonda aspannan bir dawıs maǵan: «Mınanı jazıp qoy: bunnan bılay, Iyemizge sadıq qalıp, janın qıyǵanlar qanday baxıtlı!» – dedi. «Awa, – deydi Muxaddes Ruwx, – olar miynetleriniń ráhátin kóredi. Sebebi islegen isleriniń jemisi olardan ayırılmaydı».

Jerdiń zúráátin jıynaw

14 Sońınan bir aq bulttı kórdim. Bulttıń ústinde basında altın tajı, qolında ótkir oraǵı bar, Adam Ulına uqsaǵan Birew otır edi ^{▼▼ Dan 7:13-14.}. 15 Ibadatxanadan shıqqan basqa bir perishte bulttıń ústinde Otırǵanǵa bálent dawıs penen baqırıp: «Oraǵıńdı salıp, or! Orıw waqtı keldi. Óytkeni jerdiń zúrááti pisip jetilisti», – dedi.

16 Bulttıń ústinde otırǵan oraǵın jerge siltedi hám jerdiń zúrááti orıldı.

17 Aspandaǵı Ibadatxanadan basqa bir perishte shıqtı. Onıń da ótkir oraǵı bar edi. 18 Qurbanlıq orın ústindegi otqa biylik etetuǵın bir perishte qurbanlıq orınnan shıǵıp, ótkir oraqlıǵa bálent dawıs penen: «Ótkir oraǵıńdı iske sal! Jerdegi júzim aǵashınan solqımlardı jıynap al. Sebebi júzim pisti», – dedi.

19 Perishte oraǵın jerge siltep, jerdegi júzimniń zúráátin jıynap aldı. Onı Qudaydıń ǵázebiniń úlken iskenjesine ılaqtırdı. 20 Júzim jemisleri qalanıń sırtındaǵı iskenjede sıǵıldı. Iskenjeden aqqan qan úsh júz shaqırım jerge deyin bardı hám atlardıń júwenlerine shekem kóterildi.