Rev 15 | KaaIBT22L | STEP | Men aspanda jáne ullı hám tań qalarlıq basqa bir belgi kórdim. Bul – qolına sońǵı jeti báleni uslaǵan jeti perishte edi. Óytkeni usı báleler menen Qudaydıń ǵázebi juwmaqlanatuǵın edi.

‏ Revelation of John 15

Jeti perishte hám jeti bále

1 Men aspanda jáne ullı hám tań qalarlıq basqa bir belgi kórdim. Bul – qolına sońǵı jeti báleni uslaǵan jeti perishte edi. Óytkeni usı báleler menen Qudaydıń ǵázebi juwmaqlanatuǵın edi.

2 Sonda ot aralas shiyshe teńiz sıyaqlı bir nárseni kórdim. Haywannıń, onıń músininiń hám atınıń sanı ústinen jeńiske eriskenler qollarına Qudaydıń bergen arfaların alıp, shiyshe teńizdiń ústinde turǵan edi. 3 Olar Qudaydıń xızmetshisi Muwsanıń hám Qozınıń qosıǵın aytıp turǵan edi: «Qúdireti kúshli Quday Jaratqan Iye,
Seniń isleriń ullı hám ájayıp,
O, milletler Patshası ^{▼▼ milletler Patshası – Bazı qoljazbalarda «áwladlardıń Patshası».}!
Seniń jollarıń haqıyqat hám ádil.
4 Jaratqan Iye, Sennen qorqpaytuǵın,
Atıńdı alǵıslamaytuǵın kim bar?
Sebebi tek jalǵız Sen ǵana muxaddesseń.
Pútkil milletler kelip,
Seniń aldıńda tabınadı.
Óytkeni Seniń ádil isleriń ayan boldı».

5 Bunnan soń aspandaǵı Ibadatxananıń, yaǵnıy Kelisim shatırınıń ^{▼▼ Kelisim shatırı – sózliktegi «Muxaddes shatır» ǵa qarań.} ashılǵanın kórdim. 6 Qolında jeti bále bar jeti perishte jarqıraǵan appaq zıǵır kiyim kiyip, kókireklerine altın óńirshe baylap, Ibadatxanadan shıqtı. 7 Tórt maqluqtıń biri jeti perishtege máńgi-baqıy jasaytuǵın Qudaydıń qáhárli ǵázebine tolı jeti altın kese berdi. 8 Ibadatxana Qudaydıń ullılıǵınıń hám qúdiretiniń tútini menen tolıp ketti. Jeti perishteniń jeti bálesi tamamlanbaǵansha, hesh kim Ibadatxanaǵa kire almadı.