Rev 16 | KaaIBT22L | STEP | Sońınan men Ibadatxanadan shıqqan bir bálent dawıstıń jeti perishtege: «Barıńlar! Qudaydıń ǵázebine tolı jeti keseni jerge tógińler!»

‏ Revelation of John 16

Qudaydıń ǵázebine tolı jeti kese

1 Sońınan men Ibadatxanadan shıqqan bir bálent dawıstıń jeti perishtege: «Barıńlar! Qudaydıń ǵázebine tolı jeti keseni jerge tógińler!» – degenin esittim.

2 Sonda birinshi perishte barıp, keseni jerge tókti. Birinshi jırtqısh haywannıń tamǵasına iye bolıp, onıń músinine tabınatuǵınlardıń ústinde azap beriwshi jerkenishli jaralar payda boldı.

3 Ekinshi perishte kesesin teńizge tókti. Teńiz óliniń qanına uqsaytuǵın qanǵa aylanıp, teńizdegi pútkil tirishilik nabıt boldı.

4 Úshinshi perishte kesesin dáryalarǵa hám suw bulaqlarına tókti. Olar da qanǵa aylandı. 5 Suwlar ústinen hákimlik etetuǵın perishteniń bılay degenin esittim: «Házir bar hám burınnan bar bolǵan muxaddes Qudayımız!
Seniń shıǵarǵan bul húkimleriń ádil.
6 Muxaddeslerdiń hám payǵambarlardıń qanın tókkeni ushın,
Sen olarǵa qan ishkizdiń.
Buǵan olar ılayıqlı».

7 Sonda men qurbanlıq orınnan shıqqan bir dawıstıń bılay degenin esittim: «Awa, Qúdireti kúshli Quday Jaratqan Iye,
Seniń húkimleriń tuwrı hám ádil».

8 Tórtinshi perishte kesesin quyashqa tókti. Sonlıqtan quyashqa adamlardı ot penen kúydiriw kúshi berildi. 9 Adamlardı kúshli háwir kúydirip jiberdi. Olar táwbe etpedi hám usı bálelerdiń ústinen biylikke iye bolǵan Qudaydı alǵıslamay, Onıń atına til tiygizdi.

10 Besinshi perishte kesesin jırtqısh haywannıń taxtı ústine tókti. Jırtqısh haywannıń patshalıǵı tas túnek bolıp qaldı. Adamlar azapqa shıdamay, tillerin tisledi. 11 Biraq olar jaman is-háreketleri ushın táwbe etpey, kórip atırǵan azapları hám jaraları sebepli, aspandaǵı Qudayǵa til tiygizdi.

12 Altınshı perishte kesesin ullı Evfrat dáryasına tókti. Kúnshıǵıstan keletuǵın patshalarǵa jol tayarlaw ushın, dáryanıń suwı qurıp qaldı. 13 Bunnan soń, men aydarhanıń, jırtqısh haywannıń hám jalǵan payǵambardıń awzınan shıqqan qurbaqalarǵa uqsaytuǵın úsh jawız ruwxtı kórdim. 14 Bul ruwxlar – káramatlar kórsetetuǵın jinlerdiń ruwxları edi. Olar Qúdireti kúshli Qudaydıń ullı kúninde bolatuǵın sawashqa pútkil dúnyanıń patshaların jıynaw ushın atlandı.

15 «Mine, Men urı sıyaqlı kútilmegende kelemen! Jalańash bolıp júrip, uyatqa qalmawı ushın ústindegi kiyimlerin saqlap, sergek turǵanlar qanday baxıtlı!» – dedi Iyemiz Iysa.

16 Úsh jawız ruwx evreyshe «Armagedon» dep atalatuǵın jerge patshalardı jıynadı. 17 Jetinshi perishte kesesin hawaǵa tókti. Ibadatxanadaǵı taxttan shıqqan bálent bir dawıs: «Orınlandı», – dedi. 18 Sonda shaqmaq shaǵıp, gúrsildegen dawıslar esitildi hám gúldirmama gúrkirep, kúshli jer silkiniw boldı. Adamzat jer júzinde payda bolǵalı berli, bunday kúshli jer silkiniw hesh qashan bolǵan emes. 19 Ullı qala úshke bólinip quladı. Milletlerdiń qalaları da qıyralıp qaldı. Quday ullı Babilondı yadında saqlap, Óziniń qáhárli ǵázebiniń sharabı tolı keseni oǵan ishiw ushın berdi. 20 Barlıq atawlar ornınan kóship, tawlar joq bolıp ketti. 21 Aspannan adamlardıń ústine hár bir danası batpanday kúshli burshaq jawdı. Burshaq sonshelli qorqınıshlı bolıp, adamlar usı bále ushın Qudayǵa til tiygizdi.