Rev 17 | KaaIBT22L | STEP | Jeti kesesi bar jeti perishteniń biri jaqınlap keldi de, meniń menen sóylese baslap bılay dedi: – Berman kel, men saǵan kóp suwlardıń ústinde otırǵan ullı buzıq hayaldıń qanday jazaǵa tartılatuǵının kórsetemen.

‏ Revelation of John 17

Jırtqısh haywanǵa mingen hayal

1 Jeti kesesi bar jeti perishteniń biri jaqınlap keldi de, meniń menen sóylese baslap bılay dedi:

– Berman kel, men saǵan kóp suwlardıń ústinde otırǵan ullı buzıq hayaldıń qanday jazaǵa tartılatuǵının kórsetemen. 2 Dúnya patshaları onıń menen buzıqshılıq islegen edi. Jer júzinde jasawshılar onıń buzıqshılıǵınıń sharabına más bolǵan edi.

3 Sońınan perishte meni Muxaddes Ruwxtıń basqarıwında shólge alıp bardı. Ol jerde men jeti baslı, on shaqlı, ústi Qudayǵa til tiygizetuǵın atlarǵa tolı, jırtqısh qırmızı haywannıń ústinde otırǵan bir hayaldı kórdim. 4 Hayal shım qızıl hám qımbatlı qırmızı lipaslar kiyip, altın, hasıl taslar hám hinjiler menen bezengen edi. Onıń qolında jerkenishli nárselerge hám buzıqshılıǵınıń haramılıqlarına tolı altın kese bar edi. 5 Al mańlayına bolsa:

«ULLÍ BABILON – BUZÍQLARDÍŃ HÁM JER JÚZINDEGI JERKENISHLI NÁRSELERDIŃ ANASÍ»,

degen sırlı at jazılǵan edi.

6 Hayaldıń muxaddeslerdiń hám Iysa haqqında gúwalıq berip ólgenlerdiń qanına más ekenin kórdim.

Bunı kórip, men qattı tań qaldım. 7 Perishte maǵan bılay dedi:

– Nege tań qalıp tursań? Men saǵan hayaldıń hám onı kóterip júrgen jeti baslı, on shaqlı jırtqısh haywannıń sırın ashıp beremen. 8 Sen kórgen jırtqısh haywan burın bar edi, biraq házir joq. Birazdan soń, ol tereń tuńǵıyıqtan shıǵıp, nabıt boladı. Dúnya jaratılǵannan beri atları Ómir kitabında jazılmaǵan jer júzinde jasawshılar jırtqısh haywandı kórgende hayran qaladı. Sebebi bul haywan bir waqıtları bar edi, endi joq, biraq jáne keledi.

9 Bunı túsiniw ushın danalıq kerek. Jeti bas – hayal ústinde otırǵan jeti tawdı hám jeti patshanı bildiredi. 10 Bulardıń besewi quladı, birewi bar, basqası ele kelmedi. Ol keledi, biraq uzaq waqıt turmaydı. 11 Burın bar bolǵan, biraq endi joq jırtqısh haywannıń ózi segizinshi patsha. Aldınǵı jeti patshanıń biri bolǵan ol nabıt boladı.

12 Sen kórgen on shaq ele patshalıq etpegen on patsha. Biraq bular jırtqısh haywan menen birlikte az waqıt patshalıq etiw ushın biylik aladı. 13 Bul patshalar bir niyetke iye bolıp, kúshlerin hám biyligin jırtqısh haywanǵa beredi. 14 Olar Qozıǵa qarsı urısadı, biraq Qozı olardı jeńedi. Óytkeni Qozı – húkimdarlar Húkimdarı hám patshalar Patshası. Onıń menen birge bolǵanlar – shaqırılǵanlar, tańlanǵanlar hám Oǵan sadıq qalǵanlar.

15 Sońınan perishte maǵan bılay dedi:

– Mına sen kórgen suwlar, yaǵnıy ústinde buzıq hayal otırǵan suwlar – xalıqlar, alamanlar, milletler hám tiller. 16 Sen kórgen on shaq hám jırtqısh haywan buzıq hayaldı jek kórip, onıń hámme nársesin talan-taraj etedi hám onı tır jalańash qaldıradı. Onıń etin jep, ózin otqa jandıradı.

17 Sebebi Quday Óziniń erkin orınlaw ushın, olardıń kewillerine usı niyetti salǵan edi. Solay etip, Qudaydıń sózleri orınlanıwǵa deyin olar óz ara kelisip, patshalıqların jırtqısh haywanǵa tapsıradı. 18 Sen kórgen hayal – dúnya patshalarınıń ústinen hákimlik etetuǵın ullı qala.