Rev 18 | KaaIBT22L | STEP | Bunnan soń, men kúshli biylikke iye basqa bir perishteniń aspannan túskenin kórdim. Onıń saltanatınan dúnya júzi jarqırap ketti.

‏ Revelation of John 18

Babilonnıń qulawı

1 Bunnan soń, men kúshli biylikke iye basqa bir perishteniń aspannan túskenin kórdim. Onıń saltanatınan dúnya júzi jarqırap ketti. 2 Perishte qattı dawıslap bılay dedi: «Quladı! Ullı Babilon quladı!
Ol endi jinlerdiń mákanı,
Hár túrli jawız ruwxlardıń ordası,
Hár qıylı haram hám jerkenishli quslardıń uyası boldı.
3 Óytkeni barlıq milletler,
Onıń buzıqshılıǵınıń kúshli sharabın ishti ^{▼▼ Óytkeni barlıq milletler, Onıń buzıqshılıǵınıń kúshli sharabın ishti – Bazı qoljazbalarda «Óytkeni ol óz buzıqshılıǵınıń kúshli sharabın barlıq milletlerge ishkizdi».}.
Dúnyanıń patshaları onıń menen birge buzıqshılıq isledi.
Dúnyanıń sawdagerleri de,
Onıń asıp-tasqan molshılıǵınan bayıp ketti».

4 Sonda men aspannan basqa bir dawıs esittim. Bul dawıs bılay dedi: «Háy, xalqım!
Onıń gúnalarına sherik bolıp,
Ol duwshar bolǵan bálelerge duwshar bolmawıń ushın,
Onnan shıǵıp ket!
5 Sebebi onıń gúnaları ústi-ústine jıynalıp, aspanǵa jetti,
Quday onıń jaman islerin yadında saqladı.
6 Babilon sizlerge ne qılǵan bolsa, oǵan sonı qaytarıńlar.
Islegen islerin eki ese etip qaytarıńlar,
Ózi aralastırıp tayarlaǵan sharaptan eki ese toltırıp, oǵan berińler.
7 Ol qanshama sán-saltanatqa hám molshılıqqa bólengen bolsa,
Oǵan sonshama qayǵı-hásiret berińler.
Óytkeni ol óz kewlinde:
„Men hayal patsha bolıp, taxtta otırman, jesir emespen.
Hesh qashan qayǵı kórmeymen“, – deydi.
8 Sonlıqtan ol ólim, qayǵı hám ashlıq bálelerine,
Bir kúnniń ishinde duwshar boladı,
Ol otta janıp kúl boladı.
Sebebi onı húkim qılıwshı Quday Iye qúdiretli».

9 Onıń menen birge buzıqshılıq islep, onıń asıp-tasqan molshılıǵın bólisken dúnyanıń patshaları qaladan kóterilip atırǵan ottıń tútinin kórgende, onı azalap jılaydı. 10 Olar onıń shegip atırǵan azabınan qorqıp, uzaqta turıp: «Way-way, ullı qala,
Kúshli qala Babilon!
Az waqıt ishinde húkim etildiń-ǵo», – deydi.

11 Dúnyanıń sawdagerleri de ol ushın jılap, aza tutadı. Óytkeni olardıń buyımların satıp alatuǵın endi hesh kim joq. 12 Olar mınalardı: altın, gúmis, hasıl taslar, hinji, hasıl zıǵır, jipek, shım qızıl hám qırmızı gezlemeler, hár túrli xosh iyisli aǵashlar, pil súyeginen islengen zatlar, qımbat bahalı aǵashlardan islengen nárseler, qola, temir hám mármerden islengen hár qıylı buyımlar, 13 dámli qabıq, mazalı dám beretuǵın nárseler, tútetki, átir may, ladan ^{▼▼ Ladan – xosh iyisli shayır.}, sharap, záytún mayı, sapalı un hám biyday, iri qara mal hám qoylar, atlar hám arbalar, sonday-aq adamlardı qul qılıp satıp alatuǵın hám satatuǵın edi.

14 Olar jáne: «Janıń súygen miyweler qolıńnan ketti. Pútkil baylıǵıń hám kózdi qamastıratuǵın zatlarıń joq boldı. Endi olardı hesh qashan taba almaysań», – deydi.

15 Babilonda usı nárselerdi satıp, bayıp ketken sawdagerler qalanıń shekken azabınan qorqınıshqa túsedi hám uzaqta turıp, jılap aza tutadı.

16 Olar bılay deydi: «Way, way, ullı qala!
Hasıl zıǵır, shım qızıl hám qırmızı gezlemeler kiygen,
Altın, hasıl taslar hám hinjiler menen bezengen ullı qala!
17 Usınday úlken baylıq az waqıt ishinde joq boldı».

Barlıq keme basshıları, keme jolawshıları, kemeshiler hám teńizden kún kóretuǵınlardıń hámmesi uzaqta turıp, 18 qaladan kóterilip atırǵan ottıń tútinin kórgende:

«Usı ullı qalaǵa teń keletuǵın qala bar ma?» – dep dad saldı. 19 Baslarına kúl shashtı, aza tutıp jılap, bılay dep baqırıstı: «Way, way, ullı qala!
Teńiz kemelerine iye bolǵanlardıń hámmesi,
Ol sebepli, onıń qımbat bahalı buyımları sebepli bayıǵan edi.
Degen menen, qala az waqıt ishinde wayran boldı.
20 Quwanıńlar Babilonnıń awhalına,
Háy aspan, muxaddesler, elshiler hám payǵambarlar!
Sebebi Quday onı húkim etip, sizler ushın ósh aldı».

21 Sońınan bir kúshli perishte úlken digirman tasına uqsaytuǵın bir tastı kóterip, teńizge ılaqtırdı da, bılay dedi: «Ullı qala Babilon!
Minekey, ol usınday kúsh penen ılaqtırılıp,
Máńgige joq boladı.
22 Endigiden bılay, sende tarlı ásbap shertiwshilerdiń,
Qosıqshılardıń, sırnay hám kárnay shertiwshilerdiń dawısları,
Hesh qashan esitilmeydi.
Sende qaytıp hesh bir ónerdiń ustası tabılmaydı,
Digirmannıń dawısı hesh qashan esitilmeydi.
23 Sende bunnan bılay shıra jaqtısı bolmaydı.
Kelin-kúyew sesleri hesh qashan esitilmeydi.
Óytkeni sawdagerleriń dúnyada ataqlı adamlar bolıp,
Pútkil milletler seniń sıyqırshılıǵıń menen azǵırılǵan edi.
24 Jáne de, payǵambarlardıń,
Muxaddeslerdiń hám jer júzinde óltirilgenlerdiń,
Hámmesiniń qanı sennen tabılǵan edi».