‏ Revelation of John 21

Jańa aspan hám jańa jer

1Bunnan soń, men jańa aspan menen jańa jerdi kórdim. Sebebi burınǵı aspan hám burınǵı jer joq bolıp ketken edi. Endi teńiz de joq edi. 2Jáne men aspannan, Qudaydıń janınan túsip kiyatırǵan muxaddes qala – jańa Erusalimdi kórdim. Ol óz kúyewi ushın tayarlanıp bezengen kelin sıyaqlı edi. 3Sonda taxttan shıqqan bir bálent dawıstıń bılay degenin esittim: «Mine, Qudaydıń mákanı adamlar arasında. Quday da olardıń arasında jasaydı. Olar Qudaydıń xalqı boladı, Qudaydıń Ózi de olardıń Qudayı bolıp, olar menen birge jasaydı. 4Quday olardıń barlıq kóz jasların súrtip taslaydı. Endi ólim de, qayǵı da, jılaw da, azap ta bolmaydı. Óytkeni burınǵılar ótip ketti».

5Taxtta Otırǵan:

– Endi hámmesin jańalayman, – dedi. Ol jáne maǵan: – Mınanı jaz: sebebi bul sózler isenimli hám haqıyqat, – dedi. 6Sońınan Ol maǵan bılay dedi: – Orınlandı. Men – Alfa hám Omegaman, Birinshi hám Sońǵıman. Shóllegen adamǵa ómir suwınıń bulaqlarınan esheyin suw beremen. 7Jeńip shıqqan usılardı miyras etip aladı. Men onıń Qudayı bolaman, ol Maǵan perzent boladı. 8Biraq qorqaqlar, isenbeytuǵınlar, haramılar, adam óltiriwshiler, buzıqlar, sıyqırshılar, butparazlar hám barlıq ótirikshilerdiń ornı – kúkirt janǵan ot kóli boladı. Bul – ekinshi ólim.

Jańa Erusalim

9Sońınan aqırǵı jeti bálege tolı jeti kesesi bar jeti perishteniń biri janıma kelip:

– Berman kel. Men saǵan Qozınıń qalıńlıǵın kórsetemen. Ol Qozınıń bolajaq kelinshegi, – dedi.

10Perishte meni Muxaddes Ruwxtıń basqarıwında úlken hám biyik bir tawǵa kóterdi. Ol jerden maǵan aspannan, Qudaydıń janınan túsip kiyatırǵan muxaddes qala Erusalimdi kórsetti. 11Qala Qudaydıń saltanatına iye edi. Ol hasıl tas sıyaqlı, kristallday móldir yaspis tası sıyaqlı jarqırap tur edi. 12Qalanıń úlken hám biyik diywalları bolıp, on eki dárwazası bar edi. Dárwazalardı on eki perishte qarawıllaytuǵın edi. Dárwazalarǵa Izraildıń on eki urıwınıń atları jazılǵan edi. 13Shıǵısta úsh dárwaza, arqada úsh dárwaza, qublada úsh dárwaza, batısta úsh dárwaza bar edi. 14Qalanıń diywalları on eki tiykar tasqa iye bolıp, olarda Qozınıń on eki elshisiniń atları jazılǵan edi.

15Meniń menen sóylesken perishteniń qolında qalanı hám qalanıń dárwazaları menen diywalların ólshewge arnalǵan altın tayaq bar edi. 16Qala tórt múyeshli bolıp, uzınlıǵı menen eni birdey edi. Perishte qalanı ólsheytuǵın tayaq penen ólshegende, uzınlıǵı, eni hám biyikligi birdey bolıp, hár bir tárepi eki mıń eki júz shaqırım bolıp shıqtı. 17Perishte diywallardı da ólshep shıqtı. Diywallardıń biyikligi bir júz otız eki shıǵanaq bolıp shıqtı. Perishte insan ólshemin qollanǵan edi. 18Diywallar yaspis tasınan, al qala móldir shiyshe sıyaqlı, sap altınnan salınǵan edi. 19Qala diywallarınıń tiykar tasları hár túrli hasıl taslar menen bezelgen edi. Birinshi tiykar tası yashma, ekinshisi sapfir, úshinshisi xalkidon, tórtinshisi zúmret, 20besinshisi sardoniks, altınshısı serdolik, jetinshisi xrizolit, segizinshisi berill, toǵızınshısı topaz, onınshısı xrizopras, on birinshisi yaqıt, on ekinshisi ametist. 21On eki dárwaza on eki hinji, yaǵnıy hár bir dárwaza bir hinjiden soǵılǵan edi. Qalanıń kóshesi móldir shiyshe sıyaqlı sap altınnan edi.

22Men qalada Ibadatxana kórmedim. Óytkeni Qúdireti kúshli Quday Iye hám Qozı qalanıń Ibadatxanası edi. 23Qalanı jaqtılandırıw ushın quyashtıń yamasa aydıń keregi joq edi. Sebebi Qudaydıń saltanatı onı jaqtılandırıp turatuǵın edi. Al Qozı onıń shırası edi. 24Milletler qalanıń jaqtısında júredi. Dúnya patshaları óz dańq-saltanatın ol jerge alıp keledi. 25Qalanıń dárwazaları hár qashan ashıq turadı, óytkeni ol jerde hesh qashan tún bolmaydı. 26Adamlar óz milletiniń dańq-saltanatın hám abırayın ol jerge alıp keledi. 27Biraq hesh qanday haram nárse, jerkenishli isler islegen hám jalǵan sóylegen hesh bir adam hesh qashan oǵan kirmeydi. Tek atları Qozınıń Ómir kitabında jazılǵanlar ǵana kiredi.