Rev 4 | KaaIBT22L | STEP | Bunnan soń, aspanda ashıq turǵan bir qapını kórdim. Men burın esitken dawıs, yaǵnıy kárnay sestine uqsaǵan ses maǵan bılay dedi: «Bul jerge kóteril! Men saǵan bunnan soń bolıwı tiyis waqıyalardı kórsetemen».

‏ Revelation of John 4

Aspandaǵı taxt

1 Bunnan soń, aspanda ashıq turǵan bir qapını kórdim. Men burın esitken dawıs, yaǵnıy kárnay sestine uqsaǵan ses maǵan bılay dedi: «Bul jerge kóteril! Men saǵan bunnan soń bolıwı tiyis waqıyalardı kórsetemen». 2 Sonda men dárhal Muxaddes Ruwxqa tolıp, aspanda bir taxttı hám onda Otırǵandı ^{▼▼ Otırǵan – Quday.} kórdim. 3 Taxtta Otırǵannıń kórinisi yaspis, serdolik sıyaqlı hasıl taslarday jarqırap, al taxttıń átirapın jarqıraǵan hasıl zúmret tası sıyaqlı ayqulaq qorshap turǵan edi. 4 Taxttıń dógereginde basqa jigirma tórt taxt bolıp, bul taxtlarda aq kiyimli, baslarına altın taj kiygen jigirma tórt aqsaqal otırǵan edi. 5 Taxttan shaqmaq shaǵıp, gúrsildegen dawıs shıǵıp, gúldirmamanıń gúrkiregeni esitilip turǵan edi. Al taxttıń aldında jeti shıra janıp turǵan edi. Bul – Qudaydıń jeti ruwxı. 6 Jáne taxttıń aldında kristall sıyaqlı shiyshe teńiz bar edi.

Taxttıń tórt tárepinde, yaǵnıy dógereginde aldı-artı kózge tolǵan tórt maqluq turǵan edi. 7 Olardıń birinshisi arıslanǵa, ekinshisi tanaǵa uqsaǵan edi. Al úshinshisiniń júzi adamnıń túrindey, tórtinshisi ushıp baratırǵan búrkit sıyaqlı edi. 8 Hár biriniń altı qanatı bolıp, qanatlarınıń ishi-sırtı tolǵan kóz edi. Olar kúni-túni toqtamastan: «Bar bolǵan, házir bar,
Keleshekte keletuǵın,
Qúdireti kúshli Quday Iye,
Muxaddes, muxaddes, muxaddes!» – deydi.

9 Tórt maqluq máńgi-baqıy jasaytuǵın taxtta Otırǵandı ullılap, Oǵan húrmet kórsetip shúkirlik bildirgen sayın, 10 jigirma tórt aqsaqal taxtta otırǵan máńgi-baqıy Jasaytuǵınnıń aldına jıǵılıp, Oǵan tabındı. Olar tajların taxttıń aldına qoyıp bılay dedi: 11 «Iyemiz hám Qudayımız!
Sen dańq, húrmet hám qúdiretti alıwǵa ılayıqlısań.
Sebebi hámme nárseni Sen jaratqansań.
Hámmesi Seniń erkiń menen jaratıldı hám bar boldı».