Rev 5 | KaaIBT22L | STEP | Sonda taxtta Otırǵannıń oń qolında ishi-sırtı jazılǵan, jeti mór basılıp bekitilgen bir orama qaǵazdı kórdim.

‏ Revelation of John 5

Mórlengen orama qaǵaz hám Qozı

1 Sonda taxtta Otırǵannıń oń qolında ishi-sırtı jazılǵan, jeti mór basılıp bekitilgen bir orama qaǵazdı kórdim. 2 Jáne men bálent dawıs penen járiyalap baqırǵan bir kúshli perishteni de kórdim. Ol jar salıp: «Kim bekitilgen mórlerdi buzıp, orama qaǵazdı ashıwǵa ılayıqlı?» – dedi. 3 Biraq aspanda da, jerde de, jerdiń astında da orama qaǵazdı ashıp, onıń ishine qarawǵa ılayıqlı hesh kim bolmadı. 4 Orama qaǵazdı ashıp, onıń ishine qarawǵa ılayıqlı hesh kim tabılmaǵanlıqtan, men qattı jıladım. 5 Sonda aqsaqallardıń biri maǵan:

– Jılama! Qara, Yahuda urıwınan shıqqan Arıslan ^{▼▼ Jar 49:9-10.}, Dawıttıń Tamırı ^{▼▼ Iysh 11:1, 10.} jeńip shıqtı! Ol bekitilgen jeti mórdi buzıp, orama qaǵazdı asha aladı, – dedi.

6 Sol waqıtta men taxt penen tórt maqluqtıń ortasında, aqsaqallardıń arasında bawızlanǵanǵa uqsaǵan bir Qozını ^{▼▼ Qozı – pútkil adamzat ushın qurban bolǵan Iysa Masiyxtıń tımsalı.} kórdim.

Qozınıń jeti múyizi hám jeti kózi bar edi. Bul kózler – Qudaydıń pútkil jer júzine jibergen jeti ruwxı. 7 Qozı jaqınlap barıp, taxtta Otırǵannıń oń qolınan orama qaǵazdı aldı.

8 Qozı orama qaǵazdı alǵanda, tórt maqluq hám jigirma tórt aqsaqal Onıń ayaǵına jıǵıldı. Hár biriniń qolında arfa hám tútetkige tolı altın tostaǵanlar bar edi. Bul tútetkiler muxaddeslerdiń ^{▼▼ Muxaddesler – Iysaǵa iseniwshiler.} duwaların bildiredi. 9 Olar jańa alǵıslaw qosıǵın aytıp bılay dedi: «Sen orama qaǵazdı alıwǵa hám bekitilgen mórlerdi buzıp ashıwǵa ılayıqlısań!
Óytkeni Sen Ózińdi qurban ettiń hám hár bir urıw, til,
Xalıq hám milletten shıqqan adamlardı Qudayǵa arnaw ushın,
Óz qanıńdı tógip, olardıń tólemlerin ótediń.
10 Olardı patshalıǵıńa eristirip,
Qudaydıń xızmetindegi ruwxaniyler qıldıń.
Olar jer júzinde patshalıq etedi».

11 Sońınan taxttı, maqluqlardı hám aqsaqallardı qorshaǵan esap-sansız, mıń-mıńlaǵan, millionlaǵan perishtelerdi kórdim hám olardıń dawısların esittim. 12 Olar dawıslap qosıq aytıp bılay dedi: «Bawızlanǵan Qozı kúsh, baylıq, danalıq, qúdiret,
Húrmet, dańq hám alǵıs-maqtawdı alıwǵa ılayıqlı».

13 Jáne men aspandaǵı, jer júzindegi, jerdiń astındaǵı hám teńizdegi pútkil jaratılıstıń, olardaǵı pútkil barlıqtıń bılay dep qosıq aytqanın esittim: «Taxtta Otırǵan hám Qozı,
Alǵıs-maqtawǵa hám húrmetke,
Dańqqa hám qúdiretke,
Máńgi-baqıy iye bolsın!»

14 Tórt maqluq: «Awmiyin!» dep juwap berdi, al jigirma tórt aqsaqal jerge jıǵılıp tabındı ^{▼▼tabındı – Bazı qoljazbalarda «máńgi-baqıy Jasawshıǵa tabındı».}.