Rev 6 | KaaIBT22L | STEP | Sońınan men Qozınıń bekitilgen jeti mórdiń birinshisin buzıp ashqanın kórdim. Sonda tórt maqluqtıń biriniń gúldirmamanıń gúrkiregenine uqsaǵan dawıs penen: «Kel» degenin esittim.

‏ Revelation of John 6

Bekitilgen mórlerdiń buzıp ashılıwı

1 Sońınan men Qozınıń bekitilgen jeti mórdiń birinshisin buzıp ashqanın kórdim. Sonda tórt maqluqtıń biriniń gúldirmamanıń gúrkiregenine uqsaǵan dawıs penen: «Kel» degenin esittim. 2 Qarasam, bir aq at tur eken. Attıń ústindeginiń oq jayı bar edi. Oǵan bir taj berildi. Ol jeńimpaz bolıp, jáne jeńiske erisiwge atlandı.

3 Qozı bekitilgen ekinshi mórdi buzıp ashqanda, ekinshi maqluqtıń: «Kel» degenin esittim. 4 Sonda ottay qızıl bir at shıqtı. Atqa mingenge adamlardıń bir-birin óltiriwi ushın, dúnya júzindegi paraxatshılıqtı joq qılıw biyligi berildi. Oǵan úlken bir qılısh ta berildi.

5 Qozı bekitilgen úshinshi mórdi buzıp ashqanda, úshinshi maqluqtıń: «Kel» degenin esittim. Qarasam, bir qara at tur eken. Atqa mingenniń qolında pálle tárezi bar edi. 6 Tórt maqluqtıń ortasınan shıqqan bir dawıstıń: «Bir kúnlik is haqıǵa bir qadaq biyday yamasa úsh qadaq arpa beriledi. Biraq, záytún mayına hám sharapqa zıyan tiygizbe!» – degenin esittim.

7 Qozı bekitilgen tórtinshi mórdi buzıp ashqanda, tórtinshi maqluqtıń: «Kel!» degenin esittim. 8 Qarasam, bir aqshıl sur at tur eken. Atqa mingenniń atı ólim bolıp, onıń izinen óliler mákanı erip kiyatırǵan edi. Olarǵa qılısh, ashlıq, juqpalı awırıwlar hám jerdegi jırtqısh haywanlar menen adamlardı óltiriw ushın, dúnyanıń tórtten bir bóleginiń ústinen biylik berildi.

9 Qozı bekitilgen besinshi mórdi buzıp ashqanda, qurbanlıq orınnıń astında Qudaydıń sózi hám ózleri aytqan gúwalıqları ushın óltirilgenlerdiń janların kórdim. 10 Olar bálent dawıs penen baqırıp bılay dedi: «Muxaddes hám haqıyqıy Iyemiz! Sen endi qashanǵa deyin jer júzinde jasaytuǵınlardı húkim etip, olardan tógilgen qanımız ushın ósh almawıńdı dawam eteseń?» 11 Sonda olardıń hár birine aq kiyim berilip: «Sizler sıyaqlı óltiriletuǵın ózlerińizdey xızmetshilerdiń hám tuwısqanlarıńızdıń sanı tolıq bolǵanǵa shekem az-maz kútip turıńlar», – delindi.

12 Qozı bekitilgen altınshı mórdi buzıp ashqanda qarasam, jer kúshli silkinip, quyash qara júnnen toqılǵan aza kiyimdey, al ay tolıǵı menen qan sıyaqlı qıp-qızıl bolıp ketti. 13 Al aspandaǵı juldızlar kúshli samal sebepli shayqalǵan ánjir aǵashınan pispey atırıp tógilgen miyweler sıyaqlı jerge tústi. 14 Aspan bolsa, oralǵan qaǵaz sıyaqlı joq bolıp ketti. Hár bir taw hám ataw ornınan kóshirildi ^{▼▼ Iysh 34:4.}.

15 Sonda dúnyanıń patshaları, hámeldarları, áskerbasıları, bayları, kúshlileri, barlıq qul hám azat adamları úńgirler menen tawdaǵı jartaslar arasına jasırındı. 16 Olar tawlar hám jartaslarǵa jalınıp: «Ústimizge qulap, taxttıń ústinde Otırǵannan hám Qozınıń ǵázebinen bizlerdi jasıra góriń! 17 Sebebi olardıń qáhárli ǵázebiniń kúni keldi, buǵan kim shıday aladı», – dedi.