Rev 7 | KaaIBT22L | STEP | Bunnan soń, men jer júziniń tórt múyeshinde turǵan tórt perishteni kórdim. Olar jer betine, teńizge hám hár bir terekke espesin dep, jer júziniń tórt samalın uslap turǵan edi.

‏ Revelation of John 7

Mórlengen Qudaydıń xızmetshileri

1 Bunnan soń, men jer júziniń tórt múyeshinde turǵan tórt perishteni kórdim. Olar jer betine, teńizge hám hár bir terekke espesin dep, jer júziniń tórt samalın uslap turǵan edi. 2 Men jáne shıǵıstan kóterilip kiyatırǵan, tiri Qudaydıń mórine iye basqa bir perishteni kórdim. Ol jerge hám teńizge zıyan keltiriw biyligi berilgen tórt perishtege bálent dawıs penen baqırıp: 3 «Bizler Qudayımızdıń xızmetshileriniń mańlaylarına mór baspaǵanımızsha, jerge, teńizge hám tereklerge zıyan tiygizbeńler!» – dedi. 4 Sonda men mańlaylarına mór basılǵanlardıń sanı bir júz qırıq tórt mıń ekenin esittim. Olar Izrail xalqınıń barlıq urıwlarınan edi. 5 – 6 – 7 – 8 Yahuda urıwınan on eki mıń,
Ruben urıwınan on eki mıń,
Gad urıwınan on eki mıń,
Asher urıwınan on eki mıń,
Naftaliy urıwınan on eki mıń,
Menashshe urıwınan on eki mıń,
Shimon urıwınan on eki mıń,
Lebiy urıwınan on eki mıń,
Issaxar urıwınan on eki mıń,
Zebulon urıwınan on eki mıń,
Yusup urıwınan on eki mıń,
Benyamin urıwınan on eki mıń adamǵa mór basıldı.

Hár túrli milletten bolǵan sansız xalıq

9 Bunnan soń qarasam, hár túrli milletten, hár túrli urıwdan, hár túrli xalıqtan hám hár túrli tilden bolǵan, hesh kim sanay almaytuǵın úlken topar taxttıń hám Qozınıń aldında turǵan eken. Hámmesi aq kiyim kiygen bolıp, qollarına palma aǵashınıń shaqaların uslap turǵan edi. 10 Olar bálent dawıs penen: «Qutqarıw taxtta otırǵan Qudayımızdıń hám Qozınıń qolında», – dep baqırıp turǵan edi.

11 Barlıq perishteler taxttıń, aqsaqallardıń hám tórt maqluqtıń dógereginde turǵan edi. Olar taxttıń aldında jerge jıǵılıp, Qudayǵa tabınıp bılay dedi: 12 «Awmiyin.
Alǵıs, dańq, danalıq,
Maqtaw, húrmet, kúsh-qúdiret,
Máńgi-baqıy Qudayımızdiki bolsın!
Awmiyin».

13 Sonda aqsaqallardıń biri mennen:

– Aq kiyim kiygen mına adamlar kimler, olar qayaqtan keldi? – dep soradı.

14 – Bunı siz bilesiz, mırzam, – dedim men.

Ol maǵan bılay dedi:

– Bular – awır azaptı basınan keshirgenler. Kiyimlerin Qozınıń qanı menen juwıp, appaq qılǵanlar. 15 Sonlıqtan olar Qudaydıń taxtınıń aldında turıp, Onıń Ibadatxanasında kúni-túni Oǵan xızmet etedi. Taxtta Otırǵan olar menen birge bolıp, Óz panasında saqlaydı. 16 Olar endi hesh qashan ash bolmaydı hám shóllemeydi, quyash yamasa jáziyrama ıssı olardı kúydirmeydi. 17 Óytkeni taxttıń ortasında bolǵan Qozı olardıń shopanı bolıp, tiri suw bulaqlarına alıp baradı. Quday olardıń barlıq kóz jasların súrtip taslaydı.