Rev 8 | KaaIBT22L | STEP | Qozı bekitilgen jetinshi mórdi buzıp ashqanda, aspanda yarım saattay únsizlik ornadı.

‏ Revelation of John 8

Bekitilgen jetinshi mórdiń buzıp ashılıwı

1 Qozı bekitilgen jetinshi mórdi buzıp ashqanda, aspanda yarım saattay únsizlik ornadı.

2 Sonda men Qudaydıń aldında turǵan jeti perishteni kórdim. Olarǵa jeti kárnay berildi.

3 Sońınan basqa bir perishte kelip, qurbanlıq orında turdı. Onıń qolında tútetkini tútetiwge arnalǵan altın ıdıs bar edi. Oǵan pútkil muxaddeslerdiń duwalarına qosıp, taxttıń aldındaǵı altınnan islengen qurbanlıq orınǵa baǵıshlaw ushın, kóp muǵdarda tútetkiler berildi. 4 Sonda muxaddeslerdiń duwaları menen birge tútetkiniń tútini perishteniń qolınan kóterilip, Qudaydıń aldına jetip bardı.

5 Perishte tútetki salınǵan ıdıstı alıp, onı qurbanlıq orınnıń janıp turǵan shoǵına toltırdı da, jerge ılaqtırıp jiberdi. Sonda gúldirmama gúrkirep, gúrsildegen dawıslar esitildi hám shaqmaq shaǵıp, jer silkindi.

Jeti kárnay

6 Jeti perishte qollarındaǵı jeti kárnaydı shertiwge tayarlandı.

7 Birinshi perishte kárnayın shertti. Sonda qanǵa aralasqan burshaq hám ot jerge jawdı. Jer betiniń úshten biri, tereklerdiń úshten biri hám jasıl shóplerdiń hámmesi janıp ketti.

8 Ekinshi perishte kárnayın shertti. Lawlap janǵan taw sıyaqlı úlken bir nárse teńizge ılaqtırıldı. Teńizdiń úshten biri qanǵa aylandı. 9 Teńizdegi janıwarlardıń úshten biri óldi hám kemelerdiń úshten biri qıyralıp qaldı.

10 Úshinshi perishte kárnayın shertti. Sonda aspannan shom sıyaqlı jalınlap janǵan bir úlken juldız dáryalardıń úshten bir bólegine hám suw bulaqlarınıń ústine tústi. 11 Bul juldızdıń atı – juwsan. Suwlardıń úshten bir bólegi juwsan sıyaqlı ashshı boldı. Suw ashshı bolǵanlıqtan, ishken adamlardıń kóbisi ólip qaldı.

12 Tórtinshi perishte kárnayın shertti. Quyashtıń úshten biri, aydıń úshten biri hám juldızlardıń úshten biri zaqımlandı. Olardıń úshten biri qarańǵılanıp, kúndiz hám túnniń úshten bir bólegi jaqtısız qaldı.

13 Men sońınan aspannıń ortasında ushıp júrgen bir búrkitti ^{▼▼ búrkitti – Bazı qoljazbalarda «perishteni».} kórdim hám onıń bálent dawıs penen bılay degenin esittim: «Hásiret, hásiret! Jer júzinde jasawshılar hásiret shegedi! Sebebi kárnayların shertetuǵın qalǵan úsh perishte kárnay shertiwge tayar tur!»