Rev 9 | KaaIBT22L | STEP | Besinshi perishte kárnayın shertti. Sonda men aspannan jerge túsken bir juldızdı kórdim. Oǵan tereń tuńǵıyıqtıń awzın ashatuǵın gilt berildi.

‏ Revelation of John 9

1 Besinshi perishte kárnayın shertti. Sonda men aspannan jerge túsken bir juldızdı kórdim. Oǵan tereń tuńǵıyıqtıń awzın ashatuǵın gilt berildi. 2 Juldız tereń tuńǵıyıqtıń awzın ashqanda, tuńǵıyıqtan úlken peshtiń tútinindey tútin shıqtı. Bul tútinnen quyash hám hawa qarańǵılanıp ketti. 3 Tútinniń ishinen jerge shegirtkeler jawdı. Olarǵa jerdegi shayanlardıń kúshine uqsaǵan bir kúsh berilgen edi. 4 Shegirtkelerge jerdegi kók shóplerge, ósimliklerge hám tereklerge zıyan keltirmew, tek mańlaylarında Qudaydıń móri joq adamlarǵa ǵana azap beriw buyırıldı. 5 Olarǵa bul adamlardı óltirmey, tek bes ay dawamında azap beriwge ruxsat etildi. Olar bergen azap adamdı shayan shaqqanday qıynaydı. 6 Sol kúnleri adamlar ólim izleydi, biraq taba almaydı. Óliwdi ańsaydı, biraq ólim olardan qashıp ketedi.

7 Shegirtkelerdiń kórinisi sawashqa tayarlanǵan atlar sıyaqlı bolıp, baslarında altın tajlarǵa uqsaǵan tajları bar edi. Júzleri bolsa, adamnıń júzine uqsaǵan edi. 8 Shashları hayaldıń shashınday, tisleri arıslannıń tisindey edi. 9 Kókireklerinde temir sawıtlarǵa uqsaǵan sawıtlar bolıp, qanatlarınıń sesti sawashqa shawıp baratırǵan sansız atlı arbalardıń sesti sıyaqlı edi. 10 Shegirtkelerdiń shayandikindey quyrıqları hám iyneleri bar edi. Quyrıqları adamlarǵa bes ay boyı azap beretuǵın kúshke iye edi. 11 Olardıń ústinen tereń tuńǵıyıqtıń perishtesi patshalıq etetuǵın edi. Bul perishteniń evreyshe atı Abaddon, al grekshe atı Apollion ^{▼▼ Abaddon, Apollion – ekewi de «nabıt qılıwshı» degen mánisti bildiredi.} edi.

12 Birinshi hásiret ótti, mine, bunnan soń jáne eki hásiret kelmekte.

13 Altınshı perishte kárnayın shertti. Sonda men Qudaydıń aldındaǵı altınnan islengen qurbanlıq orınnıń tórt múyeshindegi shaqlardan shıqqan bir dawıstı esittim. 14 Dawıs qolında kárnayı bar altınshı perishtege: «Ullı Evfrat dáryasınıń janında baylawlı turǵan tórt perishteni bosatıp jiber», – dedi. 15 Sonda anıq sol saat, sol kún, sol ay hám sol jıl ushın tayar turǵan tórt perishte adamlardıń úshten birin óltiriw ushın bosatılıp jiberildi. 16 Olardıń atlı áskerleriniń sanı eki júz million ekenligin esittim.

17 Ayanımda kórgen atlar menen atlılardıń kórinisi mınaday: atlılardıń ottay qızıl, qızǵısh kók hám kúkirt reńli sawıtları bar edi. Atlardıń basları arıslannıń basına uqsaǵan bolıp, awızlarınan ot, tútin hám kúkirt shıǵıp turǵan edi. 18 Adamzattıń úshten biri usı úsh báleden: bulardıń awzınan shıqqan ot, tútin hám kúkirtten óldi. 19 Óytkeni atlardıń kúshi awızlarında hám quyrıqlarında edi. Quyrıqları bası bar jılanlar sıyaqlı bolıp, adamlardı olar menen azaplaytuǵın edi. 20 Usı bálelerden ólmey qalǵan adamlar óz qolları menen islegen jaman isleri ushın táwbe etpedi. Olar ya kóre, ya esite, ya júre almaytuǵın altın, gúmis, qola, tas hám aǵashtan islengen butlarǵa hám jinlerge tabınıwdan waz keshpedi. 21 Jáne de adam óltiriw, sıyqırshılıq islew, jınısıy buzıqshılıq qılıw hám urlıq islewdi qoyıp, táwbe etpedi.