Rom 1 | KaaIBT22L | STEP | Iysa Masiyxtıń qulı bolǵan, elshilikke shaqırılıp, Qudaydıń Xosh Xabarın járiyalaw ushın tańlanǵan men, Pavelden sálem!

‏ Romans 1

Sálemnama

1 Iysa Masiyxtıń qulı bolǵan, elshilikke shaqırılıp, Qudaydıń Xosh Xabarın járiyalaw ushın tańlanǵan men, Pavelden sálem! 2 Usı Xosh Xabardı Quday Óz payǵambarları arqalı Muxaddes Jazıwlarda áwelden wáde etken edi. 3 Bul Xosh Xabar Qudaydıń Ulı haqqında bolıp, Ol adam sıpatında Dawıttıń urpaǵınan tuwıldı hám 4 Onıń Muxaddes Ruwx tárepinen ólimnen qayta tiriliwi arqalı Qudaydıń Ulı ekeni qúdiret penen dálillendi. Qudaydıń Ulı – bul Iyemiz Iysa Masiyx. 5 Masiyxtıń atı menen barlıq xalıqlardı isenimge ákeliw ushın, Ol arqalı bizler Qudaydıń miyrimine hám elshilik xızmetine iye boldıq. 6 Iysa Masiyxqa tiyisli bolıw ushın tańlanǵan sizler de usı hár túrli milletlerdensiz. 7 Quday súyip, Óz muxaddesleri ^{▼▼ Muxaddesler – Iysaǵa iseniwshiler.} bolıwǵa shaqırǵan, Rimdegi sizlerdiń hámmeńizge Ákemiz Quday hám Iyemiz Iysa Masiyx miyrim hám tınıshlıq bersin!

Paveldiń Rimge barıwdı árman etiwi

8 Aldı menen isenimińizdiń dańqı pútkil dúnyaǵa jayılǵanı sebepli, sizlerdiń hámmeńiz ushın Iysa Masiyx arqalı Qudayıma shúkirlik bildiremen. 9 Ulınıń Xosh Xabarın járiyalawda shın kewlim menen men xızmet etip atırǵan Qudaydıń Ózi duwa etkenimde sizlerdi úzliksiz tilge alıp atırǵanıma gúwa. 10 Jáne de, endi sizlerge barıwım ushın Qudaydıń qálewi menen jol ashılıwın da tınbastan sorap atırman. 11 Óytkeni isenimińizdiń bekkem bolıwı ushın sizlerge bir ruwxıy sıydı jetkereyin dep, men sizlerdi qattı kórgim kelip atır. 12 Yaǵnıy, arańızda bolǵanımda bir-birimizdiń isenimimizden jigerlensek eken deymen.

13 Tuwısqanlarım, basqa milletler arasında bolǵanı sıyaqlı, sizlerdiń arańızda da meniń islerimniń jemisi bolıwı ushın, janıńızǵa barıwdı kóp mártebe maqset etsem de, biraq házirge deyin tosqınlıqlarǵa dus kelgenimnen biyxabar qalıwıńızdı qálemeymen. 14 Meniń parızım hámmege: grek mádeniyatına tiyisli adamlarǵa hám tiyisli emeslerge, bilimli hám bilimsiz adamlarǵa Xosh Xabardı járiyalawdan ibarat. 15 Sonlıqtan qolımnan kelgenshe, Rimde bolǵan sizlerge de Xosh Xabardı járiyalawǵa tayarman.

Xosh Xabardıń kúshi

16 Sebebi men Xosh Xabardan arlanbayman. Xosh Xabar – isengen hár bir adamdı, birinshiden yahudiylerdi, sońınan yahudiy emeslerdi qutqara alatuǵın Qudaydıń kúshi. 17 Qudaydıń adamdı aqlaytuǵını Xosh Xabarda ashıq kórsetilgen. Aqlanıw isenim arqalı baslanıp, isenim arqalı dawam etedi. Muxaddes Jazıwda aytılǵanday: «Haq adam isenimi menen jasaydı». ^{▼▼ Xab 2:4.}

Qudaydıń ǵázebi

18 Haqıyqatqa óz nahaqlıǵı menen bóget bolatuǵın adamlardıń barlıq qudaysız hám nahaq islerine aspannan Qudaydıń ǵázebi tógiledi. 19 Óytkeni Quday haqqında biliwge múmkin bolǵan nárseler olarǵa belgili. Qudaydıń Ózi olarǵa usılardı málim etken. 20 Dúnya jaratılǵannan beri Qudaydıń kózge kórinbeytuǵın qásiyetleri, yaǵnıy sheksiz qúdireti hám qudaylıǵı Ol jaratqan barlıqtan seziledi hám ashıq kórinedi. Solay etip, olar ózlerin aqlay almaydı.

21 Olar Qudaydı bilse de, Onı Quday dep ullılamadı hám Oǵan shúkirlik bildirmedi. Kerisinshe, olardıń oy-qıyalları bos bolıp, aqılsız kewillerin qarańǵılıq qapladı. 22 Ózlerin aqıllımız dep sanap, aqmaq bolıp shıqtı. 23 Olar máńgi tiri Qudaydıń ullılıǵın basında ólim bar adamnıń, quslardıń, tórt ayaqlı haywanlardıń hám jer bawırlawshılardıń kórinisindegi butlarǵa almastırdı.

24 Sol sebepten Quday olardı júreklerindegi haram qálewlerine hám buzıqshılıqqa tapsırıp, bir-biriniń denesin iplaslawına tosqınlıq jasamadı. 25 Olar Qudaydıń haqıyqatın jalǵanǵa almastırdı. Jaratqanǵa emes, al jaratılǵan nársege sıyınıp, oǵan xızmet etti. Al Quday máńgi alǵıslarǵa ılayıqlı. Awmiyin.

26 Sonlıqtan Quday olardı uyatsız qálewlerine tapsırdı. Hátte, hayallar da er adam menen tábiyǵıy jınısıy qatnastı qoyıp, óz ara tábiyǵıy emes qatnas jasadı. 27 Sol sıyaqlı, er adamlar da hayal adam menen tábiyǵıy jınısıy qatnastı qoyıp, bir-birine buzıq háwes penen ıntıqtı. Erkekler erkekler menen uyatsız is-háreketler islep, óz buzıqshılıǵına ılayıq jazasın aldı. 28 Qudaydı biliwdi qálemegenlikten, Quday da olardı buzıq oy-sezimlerine hám islewge bolmaytuǵın is-háreketlerdi islewge tapsırdı. 29 Olardıń kewilleri hár túrli nahaqlıqqa, jawızlıqqa, nápsiqawlıqqa, jamanlıqqa, kúnshillikke, qanxorlıqqa, jánjelkeshlikke, hiylekerlikke hám jaman niyetke tolı. Olar jáne ósekshi, 30 jalaxor, Qudaydı jek kóriwshi, xorlawshı, menmen, maqtanshaq, jamanlıq islewge sheber, ata-anasınıń sózin tıńlamaytuǵın, 31 aqılsız, opasız, jawız hám rehimsiz adamlar. 32 Bunday islerdi islewshiler ólimge ılayıq, degen Qudaydıń ádil húkimin olar bilse de, bul islerdi tek ózleri ǵana islep qoymay, al usı islerdi islewshilerdi de qollap quwatlaydı.